Fshati Marmull përuron Naltimin e Kryqit të Shenjtë
Në kuadrin e Vitit të Fesë dhe të 1700 vjetorit të Ediktit të Milanos, të dielën
pasdite më 7 prill 2013, në fshatin Marmull të Gjakovës, u përurua një Kryqi i bukur
e i madh, simbol shëlbimi e dashurie të Zotit ndaj njerëzimit, që na mëson artin
e pajtimin me njëri tjetrin dhe të solidaritetit me të afërmin e nevojtarët. Kështu,
të Dielën e Mëshirës Hyjnore, më 7 prill, nën një shi të pareshtur, banorët e fshatin
Marmull e të fshatrave tjera të famullisë Kishtare ‘Zoja Rruzare’, në udhëheqjen dhe
organizimin e famullitarit, dom Marjan Demaj, morën pjesë në ceremoninë e bekimit
të Kryqit, të cilin e udhëhoqi Vikari i Përgjithshëm i Kishës së Kosovës, dom Lush
Gjergji. Në këtë ngjarje plot domethënie mori pjesë prifti, bir i këtij fshati, dom
David Gjugja e shumë besimtarë tjerë të Marmullit, bijtë të tjerë të Marmullit ardhur
nga diaspora e Gjermanisë e Zvicrës si dhe miq nga fshatra tjera të rrethinës. Gjatë
bekimit, dom Lush Gjergji u kujtoi të pranishmëve fjalët e Jezusit thënë nga Kryqi,
fjalë që janë program jete e që ndihmojnë në përforcimin e fesë e të vëllazërimit.
Në fjalën e tij, dom David Gjugja përgëzoi famullitarin dom Marjan Demaj e bashkëfshatarët
e Marmullit për këtë nismë teje të rëndësishme e plot domethënie, që sigurisht do
të bëhet çdo ditë më shumë pjesë e jetës dhe e dëshmisë së përditshme të dashurisë
që Zoti ka ndaj nesh e të dashurisë e të respektit të çdonjërit ndaj tjetrit. “Prania
e Kryqit të Krishtit në fshatin tim, Marmull, është gëzim i madh, është ngushëllim
e inkurajim për të gjithë. Ky simbol Hyjnor na kujton identitetin tonë shpirtëror,
rrëfen historinë e krishterë mase dymijë vjeçare në trevat shqiptare dhe na tregon
shtigjet e udhës së jetës, të udhës drejt një të ardhme sa më të mirë e të lumtur
për të gjithë”. Riti i bekimit të Kryqit u shoqërua me këngë kishtare të kënduara
nga të rinjtë vendas nën drejtimin e motrës rregulltare Volbona Ukaj nga fshati Dol.
Pjesa e fundit e ritit të bekimit të Kryqit, u mbyll me bekimin nga dom Lush Gjergji
dhe me lutjen ‘Tek Kryqi i Jezusi’ shqiptuar nga Brikena Gjugja. Dom Marjan Demaj
nënvizoi edhe një herë para besimtarëve rëndësinë e kësaj nisme që bëhet në Vitin
e Fesë në fshatin Marmull e me nisma të ndryshme edhe në të gjitha fshatrat e famullisë
së Zojës Rruzare, për të përforcuar besimin e njerëzve në Zotin dhe për të nxitur
pajtimin e solidaritetin mes njëri tjetrit. Në këtë perspektivë e për këtë qëllim
gjatë kohës së Krezhmëve nëpër shumë fshatra është kremtuar Udha e Kryqit. Së fundi
dom Marjani falënderoj të gjithë e posaçërisht banorët e fshatit Marmull për kontributin
e tyre duke uruar që Kryqi të jetë shenjë bekimi Hyjnor e vëllazërimi. E vërtetë
Kryqi i Jezu Krishti është çelësi i parajsës. Është libri më i bukur i të Kryqëzuarit
të Ngjallur, Jezu Krishtit, që na rrëfen udhën e drejtë, të vërtetën e na tregon gurrën
jetës. Nuk ka asgjë më të lartë se Kryqi për të kundruar botën, asgjë më të thellë
për të gjetur kuptimin e ekzistencës sonë njerëzore. Jezu Krishti hyri në botë me
Kryq e tani hyri edhe në çdo familje të Marmullit. Kryqi është simbol i shpërblimit
dhe i shëlbimit, por edhe paradigma e jetës të të krishterit. Në ditën e festës
së bekimit të Kryqit të Shenjtë në fshatin Marmull ne e shikojmë Kryqin e Krishtit
si lavdi e simbol, si rrugë nëpër të cilën duhet ecur ditë për ditë, në përpjekjen
për t’iu afruar lumturisë së Qiellit, Jetës së Amshuar, duke pasur gjithnjë parasysh
fjalët e Shën Palit Apostull drejtuar Galatasve: “Jam kryqëzuar me Krishtin e nuk
jam më unë ai që jeton, por Krishti që jeton në mua”. Prandaj të krishterët krenohen
me Kryqin e Zotit tonë Jezu Krishtit, sepse Kryqi është më i fuqishëm e më i madh
se të gjitha pushtetet e botës: është shenjë e fitores mbi vdekjen. Është nder për
ne të mburremi me Kryqin e Zotit tonë Jezu Krishtit, sepse në Të e kemi shëlbimin,
jetën dhe ngjalljen tonë, në sajë të Tij kemi qenë shëlbuar e liruar nga e keqja e
vdekja! I madh është misteri që na përkujton Kryqi. Një gjë është plotësisht e qartë:
“Kush merr pjesë në mundimet e Krishtit në Kryq, merr pjesë edhe në gëzimin e Tij”.
Sa herë i lartojmë sytë nga Kryqi, kujtojmë Atë që pësoi për ne, që na do, që na shkëputi
nga pushteti i terrinave, duke pranuar vdekjen, për të na bërë trashëgimtarë të Jetës
së Pasosur. Por ç’kuptim ka ta naltosh Kryqin? Thua s’është shkandull të nderosh
një mjet çnderues vdekjeje? Por Shën Pali Apostull thotë “Ne predikojmë Krishtin e
kryqëzuar, shkandull për Judenjtë, çmenduri për pagantë” (1 Kor 1, 23). Duhet
pasur, veç, parasysh se të krishterët nuk naltojnë çdo lloj kryqi, por atë Kryq të
cilin jezu Krishti e shenjtëroi me flijimin e vet, fryt e dëshmi e dashurisë që s’njeh
masë. Krishti mbi kryq derdhi gjithë gjakun e vet për ta çliruar njerëzimin nga skllavëria
e mëkatit dhe e vdekjes. Prandaj, nga shenjë mallkimi, Kryqi u shndërrua në shenjë
bekimi, nga simbol i vdekjes në vetë simbolin e dashurisë, që e mund urrejtjen e dhunën
dhe lind jetën e pavdekshme. "O Crux, ave spes unica! O Kryq, të falem, ty,
e vetmja shpresë!” . Kështu këndon liturgjia. E Ungjilltari rrëfen: tek këmbët
e Kryqit të Krishtit ishte Maria (shih Gj. 19, 25-27). Dhimbja e saj dhe dhimbja e
të Birit janë një. Është një dhimbje plot me fe e me dashuri. Virgjëra mbi Kalvar
merr pjesë në forcën shëlbuese të dhimbjes së Krishtit, duke i shtuar “po’-në e saj
pohimit të të Birit. Të bashkuar shpirtërisht me Zojën e Bekuar Rruzare, edhe ne
t’i themi përsëri “po” Zotit, që zgjodhi rrugën e Kryqit për të na shëlbuar. Është
një mister i madh që vijon akoma, deri në fund të fundit të botës e që na kërkon të
bashkëpunojmë. Maria na ndihmoftë ta marrim çdo ditë kryqin tonë e ta ndjekim besnikërisht
Jezusin në rrugën e bindjes, të flijimit, të pajtimit e të dashurisë. Po kujtojmë
se Kryqi në fshatin Marmull të Gjakovës është i lartë 10 metra e është realizuar nga
arkitekti Ardian e vëllezërit Dodaj, me kontributin e banorëve të fshatit Marmull,
sipas idesë e nën udhëheqjen e famullitarit të ‘Zojës Rruzare’ dom Marjan Demaj.
E pikërisht dom Marjani, mikrofonin e Radio Vatikanit flet mbi domethënien dhe mesazhin
e këtij simboli, ta dëgjojmë........