Doli nga Shtëpia Botuese e Vatikanit libri me titull: “Ju kërkoj të luteni për mua”
Doli nga Shtëpia Botuese e Vatikanit libri i ri, titulluar “Ju kërkoj të luteni
për mua”. Përmbledh të gjitha fjalimet e Papës Françesku, që nga përshëndetja
e parë drejtuar turmës, menjëherë pas zgjedhjes, më 13 mars, tek lutja e Mbretëreshës
Qiellore e së Hënës së Engjëllit. Kjo vepër pason botimin, javën e kaluar, gjithnjë
nga Shtëpia Botuese e Vatikanit, e dy teksteve të kardinalit të atëhershëm Bergolio:
“ Të kapërcesh pragun e fesë”, letër drejtuar kryedioqezës së Buénos Ájres për Vitin
e Fesë dhe “Ne si qytetarë, ne si popull. Drejt një dyqindvjetori me drejtësi e solidaritet,
2011-2016”, fjalim i kardinalit Horhe Mario Bergolio mbajtur më 16 tetor 2010, me
rastin e dyqindvjetorit të kombit argjentinas. “Ju e dini se detyra e Konklavit
ishte t’i jepte një ipeshkëv Romës. Duket se vëllezërit e mi kardinaj shkuan ta marrin
gati në fund të botës... Po jemi këtu... Ju falënderoj për pritjen. Bashkësia dioqezane
e Romës ka ipeshkvin e vet: faleminderit!”. Me këto fjalë hapet libri i ri:
“Ju kërkoj të luteni për mua”. Janë fjalët e para të shqiptuara nga Papa Françesku
më 13 mars 2013, në orën 20.26 nga lozha qendrore e Bazilikës së Shën Pjetrit, një
cekje e matur për viset nga vinte. Sollën në Shesh jehonën e largët të një “Pape
tjetër, ardhur nga larg”, që i paraqitej turmës në një mbrëmje të ngjashme tetori,
35 vjet më parë. Vepra e re, me 96 faqe, përmbledh 19 tekste, të parat e magjisterit
të Papës së ri, që vijon misionin e madh, të përhershëm të Kishës Katolike për t’ia
çuar Jezu Krishtin njeriut e për t’i prirë drejt takimit me Jezu Krishtin, që është
Udha, e Vërteta, Jeta, i pranishëm me të vërtetë në Kishë e bashkëkohas me çdo njeri.