Кардынал Руіні: папа Францішак прынёс подых маладосці старажытнаму Касцёлу
“Папа Францішак, безумоўна,
прынёс подых маладосці і лепшай будучыні для старажытнага і традыцыйнага Рымскага
Касцёла”, - лічыць кардынал Каміла Руіні, былы Папскі вікарый для Рымскай дыяцэзіі.
Для яго св. Імша разам з Пантыфікам у базыліцы св. Яна на Латэране была “момантам
глыбокіх духоўных і рэлігійных пачуццяў”. “Папа – гэта чалавек вялікай прастаты і
непасрэднасці, але таксама і вельмі глыбокай духоўнасці”, - адзначыў кардынал Руіні.
Ён падкрэсліў, што Святы Айцец гэта чалавек, які ўспрымае малітву не толькі як духоўнае
практыкаванне, якое адбываецца на ўнутраным узроўні, але і як момант адкрыцця на Бога.
Іерарх заўважыў, што Францішак звяртае нашу ўвагу на любоў Бога да чалавека, любоў,
якой з’яўляецца прабачэнне і міласэрнасць.
Для кардынала Руіні Пантыфік з’яўляеецца
“вялікім дарам” для Касцёла. “Той факт, што Францішак хоча выкарыстоўваць у першую
чаргу тытул Біскупа Рыма спрыяе, безумоўна, экуменічным адносінам, асабліва з праваслаўнымі
Цэрквамі”, - заўважыў ён. Гэта “прымушае таксама задумацца над сапраўднай сутнасцю
служэння Пятра, тут у Рыме, як біскупа, які праліў сваю кроў праз пакутніцкую смерць,
каб засведчыць сваю веру і падтрымаць у ёй сваіх братоў”, - дадаў былы Папскі вікарый.
“Гэта вялікі дар, які Касцёл у Рыме атрымаў і павінен цалкам усведамляць гэта”, -
лічыць іерарх.