Papa pret Ban Ki-mun: me OKB-në, ide dhe objektiva të përbashkëta
Selia e Shenjtë dhe Kombet e Bashkuara kanë ide dhe objektiva të përbashkëta. Kështu
i tha sot paradite, Sekretari i Përgjithshëm i OKB-së Ban Ki-mun, Papës Françesku,
i cili e priti për herë të parë në audiencë në Vatikan. I shoqëruar nga një delegacion
prej 12 vetësh, ndër të cilët, edhe përgjegjësi për çarmatimin, Ban Ki-mun e quajti
“nder të madh” takimin me Atin e Shenjtë, një nga krerët shpirtërorë të botës, siç
i tha. Takimi zgjati rreth 20 minuta. “Vij në emër të Kombeve të Bashkuara – i
tha Papës Bergolio, Sekretari i Përgjithshëm – e ju bëj urimet më të mira për fillimin
e misionit papnor. Selia e Shenjtë dhe OKB-ja kanë ide e objektiva të përbashkëta”. Në
notën e Sallës së Shtypit të Vatikanit, shpjegohet: “Takimi, që bën pjesë në traditën
e audiencave të Papëve me Sekretarët e ndryshëm të Përgjithshëm të Kombeve të Bashkuara,
dëshiron të shprehë vlerësimin e Selisë së Shenjtë për rolin qendror të Organizatës
në ruajtjen e paqes në botë, në promovimin e së mirës së përbashkët të njerëzimit
dhe në mbrojtjen e të drejtave themelore të njeriut. Gjatë bisedimeve të
përzemërta – vazhdon akoma nota, duke iu referuar edhe atyre me Sekretarin e Shtetit
të Vatikanit dhe me Sekretarin për Marrëdhëniet me Shtetet – u fol për tema me interes
të ndërsjelltë, në veçanti, për konfliktet e emergjencat e rënda humanitare, sidomos
për atë në Siri, por edhe për të tjera, si ajo e gadishullit korean dhe e kontinentit
afrikan, ku paqja e qëndrueshmëria kërcënohen vazhdimisht. U përmend problemi i trafikut
të njerëzve, në veçanti të grave, dhe problemi i refugjatëve dhe i emigrantëve. Sekretari
i Përgjithshëm i OKB-së, i cili ka filluar kohët e fundit, mandatin e dytë në detyrë,
paraqiti programin e tij pesëvjeçar, përqendruar në parandalimin e konflikteve, në
solidaritetin ndërkombëtar dhe në zhvillimin e barabartë e të qëndrueshëm. Papa
Françesku kujtoi kontributin e Kishës Katolike në favor të dinjitetit të plotë të
njeriut, për nxitjen e një kulture takimi ndërmjet popujve e njerëzve, duke ruajtur
identitetin e vet dhe me mjetet e saj të veçanta, që përkojnë edhe me qëllimet më
të larta të OKB-së”. Në përfundim të audiencës, Ban Ki-mun i dhuroi Atit të
Shenjtë një vëllim të çmuar të “Kartës së OKB-së” në gjashtë gjuhë të botës (anglisht,
frëngjisht, rusisht, spanjisht, kinezçe dhe arabisht), me një kushtim për Papën në
faqen e parë. Papa i dhuroi mikut të nderuar një kuadër-mozaik të Romës dhe Rruzaren
e Shenjtë të bekuar prej tij, që ua shpërndau edhe anëtarëve të tjerë të delegacionit.
Që nga koha e Papës Gjoni XXIII, në Vatikan, janë pritur 7 Sekretarë të Përgjithshëm
të OKB-së.