Sipas traditës së krishterë, janë 28 këmbë shkalle prej mermeri të bardhë. Formonin
shkallën e madhe të Pallatit të Poncit Pilat në Jeruzalem. Jezu Krishti u ngjit e
zbriti disa herë nëpër shkallaret e saj, para se ta kryqëzonin. Shkalla u mbulua me
dru arre nga Papa Inoçenci VIII, për ta mbrojtur nga rreziku i shkatërrimit. Shkalla
Shenjte bën pjesë në një kompleks ndërtesash, që njihet me emrin Shenjtërorja e Shkallës
së Shenjtë. Ndodhet pranë e pranë Bazilikës së Shën Gjonit në Lateran. U realizua
nga fundi i shekullit XVI, nën papninë e Sikstit V, nga Domeniko Fontana. Kompleksi
përfshin: Shkallën e Shenjtë, në të dy anët e së cilës zgjaten katër shkallare,
dy më të djathtën e dy më të majtën; Kapelën e Shën Lorencit në Palatio, që njihet
me emrin Sancta Sanctorum, domethënë Kapela private e Papës, ku ruhet edhe “Acheropita
lateranense”; Oratorin e Shën Silvestrit në Palatio, ku mund të hyhet nga shkallët
e së djathtës. Kujtojmë edhe ndërtesën e të Shenjtnueshmit Sakrament në Lateran si
dhe Triclinium Leoninum. Shkalla e Shenjtë u mbart nga Pallati i Lateranit, në
vendin ku ndodhet edhe sot, në vitin 1589, nën papninë e Sikstit V. Sipas gojëdhënës,
Shkallën e Shenjtë e solli në Romë Flavia Gjulia Helena, nëna e Kostandinit të Madh,
në vitin e largët 326. E stolisur në të dy krahët me afreske me tema ungjillore,
realizuar nën drejtimin e Çesare Nebia e Gjovani Guerra, është gjithnjë përplot me
besimtarë, që ngjiten në gjunjë, në heshtje të plotë, duke u lutur e duke kërkuar
hire. Në majë të Shkallës, është Kapela e quajtur Sancta Sanctorum, ku ruhen disa
nga reliket më të rëndësishme kristiane. Siksti V ndërtoi, aty ku përfundon Shkalla
e Shenjtë, Kapelën Shtëpijake (Domestica) të Papës, që më parë ishte në Pallatin e
Lateranit, sot Seli e Vikariatit të Romës.