Հիւսիսային Քորէա Երկրորդ Պալիստական Հրթիռ Մը Տեղակայած Է Իր Արեւելեան Ծովափին Մէջ
«Վրեմիա»` մէջբերելով «Ռենհափ» լրատու գործակալութիւնը, կը հաղորդէ, որ Փիոնկիանկ միջին
հասողութեամբ երկրորդ հեռահար հրթիռը տեղակայած է երկրին արեւելեան ծովափին վրայ: Գործակալութիւնը
կը հաղորդէ, որ տեղակայուած հրթիռին թիրախը տակաւին յստակ չէ: Հինգշաբթի օր «Ռենհափ»
գործակալութիւնը հարաւային քորէական եւ ամերիկեան հետախուզական ծառայութիւններուն յղում
կատարելով հաղորդած էր, որ Հիւսիսային Քորէան իր արեւելեան ծովափին վրայ «Մուսուտան»
տիպի հեռահար հրթիռ տեղակայած է: Ծանօթ է, որ այդ տիպի հրթիռներու թռիչքի հեռաւորութիւնը
3-4 հազար քիլոմեթր է: Նախապէս հաղորդուած էր, որ Հիւսիսային Քորէայի ղեկավար Քիմ
Ժոնկ Ուն իր զինուորներէն պահանջած է առաջինը կրակ չբանալ: Ռուսիոյ արտաքին գործոց
նախարարութեան յատուկ յանձնարարութիւններով դեսպան Կրիկորի Լոկվինով յայտարարած էր, որ
ռուս փորձագէտներու կարծիքով, Փիոնկեանկ եւ Սէուլ պատերազմի պիտի չսկսին, սակայն տեղական
տագնապը չի բացառուիր: Նշենք, որ Հիւսիսային Քորէա երէկ Ռուսիայէն պահանջեց Փիոնկեանկի
մէջ իր դեսպանատան անձնակազմի անդամները երկրէն հեռացնելու հարցը քննարկել: