Հայաստանի Բնակիչներուն 40 Տոկոսը Կ՛ուզէ Ընդմիշտ Լքել Երկիրը
ԵՐԵՒԱՆ, «Նիուզ».– «Կելլոփ Ուըրլտ» հարցախոյզին մասնակցած յետխորհրդային երկիրներու բնակիչներէն
հայրենիքը ընդմիշտ լքելու փափաք յայտնողներու մեծագոյն թիւը արձանագրուած է Հայաստանի
մէջ։ «Կելլոփ Ուըրլտ» միջազգային կեդրոնին մէջ «ԱՊՀ երկիրներու սահմանները լքելու
ցանկութիւն» հարցախոյզը կատարուած է 2010-2012ին՝ յետխորհրդային 12 երկիրներու մէջ:
Հարցումները ուղղուած են հարցազրոյցի ճամբով, որուն մասնակցած է 41 հազար անձ՝ 15 տարեկանէն
սկսեալ։ Այդպիսով, Հայաստանը ընդմիշտ լքելու փափաք յայտնած է հարցախոյզին մասնակիցներուն
40 տոկոսը։ Յաջորդ դիրքին վրայ է Մոլտովիան՝ 32 տոկոս: Երրորդ դիրքը կը գրաւէ Ուքրանիան
(21 տոկոս), չորրորդ՝ Պելոռուսը (17 տոկոս), իսկ հինգերորդը Ղրղըզստանն է (16 տոկոս):
Հայրենիքէն հեռանալու նուազագոյն փափաք ունեցողները Իւզպեքիստանի՝ 5 տոկոս, Թուրքմէնիստանի՝
6 տոկոս, Տաճիկիստանի՝ 11 տոկոս եւ Ղազախստանի՝ 13 տոկոս, բնակիչներն են: Միջին հաշուով
հարցախոյզին մասնակցած յետխորհրդային պետութիւններուն մէջ ապրողներէն 15 առ հարիւրը կ՛ուզէ
արտագաղթել։ Մասնակցածներու 52 տոկոսը որպէս հիմնական պատճառ նշած է կենսամակարդակը բարելաւելու
փափաքը: Պատասխանողներուն 13 տոկոսը նշած է, որ պատրաստ է լքելու հայրենիքը՝ իր զաւակներուն
ապագային համար, իսկ 10 տոկոսը՝ աշխատանքի բացակայութեան կամ աշխատանքի ընդունուելու
խն-դիրներուն պատճառով: Հայրենիքը լքելու այլ պատճառներու շարքին նշուած է նաեւ ընկերային
ապահովուածութեան ցած մակարդակը (պատասխանողներուն 4 տոկոսը), հարազատներուն մօտ ըլլալու
փափաքը կամ միտումը ապրելու այնպիսի երկիրի մը մէջ, ուր մարդու իրաւունքները պաշտպանուած
են (3 տոկոս):