Իսրայէլեան ձայնասփիւռի կայանը յայտարարեց, որ իսրայէլեան իշխանութիւնները յայտարարած
են, որ ղպտի տասնեակներով ընտանիքներու, որոնք Եգիպտոսէն Թել Աւիւ հասած են, իրաւունք
տուած է Իսրայէլ հաստատուելու: Կայանին կայքէջը հաղորդեց, որ Թել Աւիւ այդ ընտանիքներուն
Իսրայէլ ապաստանելու իրաւունք տուած է, պայմանաւ որ անոնց մօտ ըլլան պաշտօնական փաստաթուղթեր,
որոնք ցոյց կու տան, որ Եգիպտոսի մէջ հալածանքի ենթարկուած են: Ձայնասփիւռի կայանը
կը հաղորդէ, որ այս զարգացումը տեղի կ՛ունենայ, մինչ եգիպտացի ղպտիներ կը շարունակեն
Իսրայէլ ճամբորդել` այցելելու համար սրբազան վայրերը, հակառակ անոր որ ղպտի եկեղեցին
իր հաւատացեալներուն արգիլած է մինչեւ Երուսաղէմի իսրայէլեան բռնագրաւումէն ազատագրումը
Իսրայէլ այցելել: Ղպտիներու Թէոդորոս Բ. պապը յայտարարած է, որ կառչած կը մնայ իր
նախորդին` Շնոտա Գ. պապին բռնագրաւեալ Երուսաղէմ այցելութիւնը արգիլող որոշումին, որ
օրին Շնոտա Գ. պապին եւ Եգիպտոսի նախկին նախագահ Անուար Սատաթի միջեւ տագնապ մը ստեղծած
էր: