Папа Францішак выразіў
глыбокую заклапочанасць і блізасць жыхарам Аргентыны ў сувязі з праліўнымі дажджамі,
у выніку якіх загінула каля 60 чалавек і некалькі тысяч засталіся без даху над галавой.
У сваім пасланні скіраваным 4 красавіка за подпісам кардынала Дзяржсакратара Тарчызіа
Бэртонэ, Святы Айцец звярнуўся да ахвяраў катаклізма, а таксама ўсіх тых, хто задзейнічаны
ў выпраўленні яго наступстваў. Пантыфік заклікаў “грамадскія і касцёльныя структуры,
а таксама ўсіх людзей добрай волі з любоўю і ў духу хрысціянскай салідарнасці аказваць
неабходную дапамогу, тым, хто згубіў свае дамы і маёмасць”. Праліўныя дажджы прайшлі
ў Аргентыне 2-3 красавіка і галоўным чынам закранулі Буэнас-Айрэс і горад Ла-Плата,
які знаходзіцца ў 60 км ад сталіцы. Усяго ад дажджоў пацярпелі каля 350 тыс. чалавек.
У сувязі з гэтым у Аргентыне была аб’яўлена трохдзённая жалоба. Паводле метэаролагаў
у сталіцы краіны выпала каля 400 мм ападкаў, а вада ў некаторых месцах паднялася да
2 м, што з’яўляецца абсалютным рэкордам для рэгіёна. Аргентынскія ўлады заклапочаны
кліматычнымі зменамі, якія з кожным годам прыводзяць да ўсё больш цяжкіх наступстваў.