Revista e jezuitëve “Qytetërimi Katolik” përtërihet. Atë Spadaro: Papa Françesku na
nxit t’i aktualizojmë mësimet e Kishës
Është revista italiane më e vjetër, akoma aktive e tani, përtërihet e zbarkon në të
gjitha platformat dixhitale. Është e mirënjohura “Qytetërimi Katolik”, e përdyjavshmja
e jezuitëve, themeluar më 6 prill 1850. Nesër, në Sallën e Shtypit të Vatikanit, do
të paraqitet numri i parë i formatit të ri në letër e në internet. Por a ndryshon
vetëm pamja e jashtme, e atyre faqeve të mbushura me reflektime e mendime të vyera
për Kishën e për botën? Folëm me drejtorin e revistës, jezuitin, atë Antonio Spadaro:
Ndryshimi i
parë është natyrisht, më i dukshmi, dhe ka të bëjë me faqosjen grafike e me kapakun,
i cili frymëzohet nga të mëparshmit, në përdorim deri në vitin 1970. Por, ndryshimet
prekin edhe strukturën e revistës. Disa rubrika nuk do të jenë më, disa të tjera do
të ndryshojnë e ka edhe disa të reja. Po përpiqemi të kuptojmë rolin e një reviste
sot, në një çast kur informacioni përhapet menjëherë në shumë mënyra. Kemi nevojë
të reflektojmë më shumë, ta lidhim mendimin e Kishës me jetën e shoqërisë e me jetën
kulturore të botës së sotme. Pastaj, risia tjetër e madhe është se do të përdorim
botën dixhitale – internet, tablet, celular – do ta ndajmë përmbajtjen e revistës
me të tjerët përmes rrjeteve shoqërore… Një tjetër element themelor, për të cilin
falenderoj “Google”, është konsultimi i lirë e falas në internet i gjithë arkivit
tonë, nga viti 1850 deri në vitin 2008. Përtëritja e revistës bëhet në vazhdën
e asaj fryme krijuese, që predikonin edhe etërit themelues, tashmë mëse 150 vjet më
parë. Revista rinohet por u mbetet besnike atyre, apo jo? T’i qëndrosh besnik
traditës do të thotë ta kuptosh atë, pra, të kuptosh se ç’i shtyu etërit themelues
të “Qytetërimit Katolik” të mendojnë për një revistë të tillë. Duke studiuar dhe duke
analizuar zanafillën, kuptohet qartë se edhe atëherë, revista ishte diçka krejtësisht
e re në panoramën e kohës. Pra, sigurisht që duke u përtërirë, u mbetemi besnikë atyre. Ky
ndryshim është menduar e përgatitur para zgjedhjes së Papës Françesku, i cili u tha
gazetarëve të mos mbyllen në rrethin e tyre të ngushtë, por t’ia hapin portat botës.
A janë nxitje edhe për ju, këto fjalë? E ndjejmë veten shumë të inkurajuar nga
ato fjalë, që, në fund të fundit, përbëjnë thelbin e gazetarisë, aftësinë për ta interpretuar
realitetin me kategori, që frymëzohen nga e vërteta, mirësia, bukuria. Ky është misioni
ynë: të gjejmë çelësin për ta kuptuar këtë botë kaq të ndërlikuar, si e jona. Nga
kjo pikpamje, do të kemi më shumë artikuj nga sa kemi pasur deri tani, por gjithnjë
me firmën e jezuitëve, sepse revista jonë frymëzohet nga karizma e Shoqërisë së Jezusit,
themelore për të.