Уваскрасенне Хрыста
– гэта наша сіла! З такімі словамі 3 красавіка папа Францішак звярнуўся да вернікаў
сабраных на плошчы св. Пятра з нагоды агульнай аўдыенцыі. Падчас яе Пантыфік працягнуў
цыкл катэхез, прысвечаных Году веры, які пачаў яшчэ яго папярэднік Бэнэдыкт XVI. У
цэнтры разважанняў Святога Айца былі словы Сімвала веры – “На трэці дзень уваскрос,
паводле Пісання”, якія непасрэдна адносяцца да Вялікадня. Пантыфік звярнуў увагу на
тое, што, нажаль, часта існавалі спробы размыць веру ва Уваскрасенне Езуса, і нават
паміж вернікаў закраліся сумнівы. “Так адбывалася з-за павярхоўнасці, часам з-за абыякавасці,
заклапочаннасці многімі рэчамі, якія лічыліся больш важнымі, чым вера, ці з-за выключна
гарызантальнага бачання жыцця (...). Але менавіта Уваскрасенне адкрывае нас на самую
вялікую надзею, адкрывае наша жыццё і жыццё свету на вечную будучыню з Богам, на поўнае
шчасце, на ўпэўненасць у тым, што зло, грэх, смерць могуць быць пераможаны”, - сказаў
Святы Айцец.
Папа адзначыў, што сведчанне веры ва ўваскрасенне Хрыста ў Новым
Запавеце прадстаўляецца двума спосабамі: у форме вызнавання веры або кароткіх формулах
і ў форме апавяданняў аб уваскрасенні і фактах звязаных з ім. Паводле Святога Айца,
узорам першага спосабу могуць паслужыць словы з Сімвала веры ці Паслання св. Паўла
да Рымлянаў: “Таму, калі ты вуснамі сваімі будзеш вызнаваць, што Езус ёсць Панам,
і ў сэрцы сваім верыць, што Бог уваскрасіў Яго з мёртвых, будзеш збаўлены” (10,9).
Больш
падрабязна папа Францішак расказаў пра другі спосаб, а менавіта пра сведчанне веры
ў форме апавяданняў, якія можна знайсці ў Евангеллях. Пантыфік звярнуў увагу на тое,
што першымі сведкамі ўваскрасення былі жанчыны, якія адразу падзяліліся навіной аб
уваскрасенні Хрыста, а “не трымалі яе для сябе”.
“Гэтак павінна адбывацца і
ў нашым жыцці. Будзем жа адчуваць радасць быцця хрысціянамі! (...) Будзем жа мець
адвагу “выйсці”, каб несці гэту радасць і святло ва ўсе сферы нашага жыцця! Уваскрасенне
Хрыста – гэта наша вялікая ўпэўненасць; гэта самы каштоўны скарб! Як не падзяліцца
з бліжнімі гэтым дарам, гэтай цудоўнай упэўненасцю. Яна не толькі для нас, але для
таго, каб перадаваць яе, каб даць яе іншым, падзяліцца з іншымі. У гэтым наша сведчанне
”, - сказаў Пантыфік.
Папа адзначыў, што, калі гаворка ідзе пра вызнанні веры
ў Новым Запавеце, у якасці сведкаў уваскрасення выступаюць толькі мужчыны, апосталы,
ніколі не жанчыны. Гэта звязана з тым, што паводле яўрэйскіх законаў сведчанне жанчын
і дзяцей на магло лічыцца пераканаўчым. Але ў апавяданнях евангелістаў, наадварот,
жанчыны маюць фундаментальную ролю. Паводле Папы, гэты факт сведчыць на карысць гістарычнай
праўдзівасці ўваскрасення: “калі б яно было выдумкай, у канктэксце таго часу, не было
б звязана са сведчаннем жанчын. Але евангелісты проста расказалі тое, што адбылося:
жанчыны былі першымі сведкамі. Гэта гаворыць аб тым, што Бог не выбірае паводле чалавечых
крытэрыяў: першымі сведкамі нараджэння Езуса былі пастухі, простыя і сціплыя людзі;
першымі сведкамі ўваскрасення – жанчыны. І гэта цудоўна, і ў гэтым місія жанчын, маці,
бабуль. Давайце сведчанне сваім дзецям, сваім унукам, аб тым, што Езус жывы, уваскослы.
Маці і жанчыны, ідзіце наперад з гэтым сведчаннем!”
Папа таксама адзначыў,
што сёння існуюць шматлікія знакі, у якіх Уваскрослы дае сябе распазнаць: Святое Пісанне,
Эўхарыстыя, іншыя сакрамэнты, міласэрная любоў. “Дазволім асвяціць сябе ўваскрасеннем
Хрыста, дазволім перамяніць сябе яго сілай, каб праз нас у свеце знакі смерці саступілі
месца знакам жыцця”, - сказаў Папа. Пантыфік звярнуў увагу на тое, што на плошчы св.
Пятра прысутнічала вялікая колькасць моладзі. Да яе ён звярнуўся з заклікам мужна
дзяліцца сведчаннем пра ўваскрасенне і такім чынам несці надзею гэтаму свету, “які
крыху састарэў праз войны, зло, грэх”. “Наперад моладзь!”, - заклікаў Францішак.