Папская біблійная камісія збярэцца на пленарнае пасяджэнне
Папская біблійная
камісія збярэцца на сваё штогадовае пленарнае пасяджэнне 8 красавіка 2013 г. Сустрэча,
якая працягнецца пяць дзён, будзе адбывацца ў Доме св. Марты пад старшынствам арцыбіскупа
Герхарда Людвіга Мюлера, прэфекта Кангрэгацыі Веравучэння і старшыні камісіі. Працамі
асамблеі будзе кіраваць кс. Клеменс Шток, яе генеральны сакратар. Як гаворыцца ў спецыяльным
паведамленні гэтай структуры, у ходзе пасяджэння яе члены завершаць разважанні і даклады
ў рамках даследавання натхнення і праўды ў Бібліі. На працягу некалькіх гадоў камісія
прыкладала намаганні па вывучэнні гэтай тэмы ў розных кнігах Святога Пісання. Члены
камісіі лічаць, што сваёй працай яны ўнеслі ўклад у разуменне Божага слова ўсімі вернікамі
і развіццё іх асабістых адносін з Богам.
“Толькі ў кантэксце Касцёла Святое
Пісанне можна зразумець як сапраўднае Божае слова, - пра гэта казаў Бэнэдыкт XVI падчас
аўдыенцыі для ўдзельнікаў пленарнага пасяджэння Папскай біблійнай камісіі ў красавіку
2009 г. У той час Пантыфік звярнуўся да тэмы задання каталіцкага экзэгета. Экзэгеза
не можа быць ні звычайным інтэлектуальным практыкаваннем, ні “індывідуальным навуковым
намаганнем”, але заўсёды павінна “супастаўляцца з жывой традыцыяй Касцёла, уключана
ў яе і ёю пацверджана”, - гаварыў Бэнэдыкт XVI. Чатыры гады таму Пантыфік таксама
выказаў упэўненасць у тым, што “у свеце, дзе навуковыя даследаванні з кожным разам
атрымліваюць усё большае значэнне, неабходна, каб экзэгетычная навука выйшла на належны
ўзровень”.