Papa në audiencën e përgjithshme: “Ngjallja e Krishtit, është forca jonë”.
Ngjallja e Krishtit është forca jonë. Këtë theksoi Papa Françesku gjatë audiencës
së sotme të përgjithshme, mbajtur në Sheshin e Shën Pjetrit, në praninë e 30 mijë
vetëve. Shën Pali Apostull, theksoi Papa gjatë audiencës, pohon: “Në qoftë se Krishti
me të vërtetë nuk u ngjall, atëherë i kotë është predikimi ynë e i kotë edhe besimimi
juaj. E ju vijoni të jeni ende në mëkate tuaja”. Për fat të keq, vijoi Ati i Shenjtë,
shumë shpesh bëhen përpjekje për ta errësuar besimin në Ngjalljen e Krishtit e, madje,
edhe disa nga besimtarët nganjëherë shprehin dyshimet e tyre. Kjo ndodh herë për shkak
të cektësisë së fesë, herë tjetër, për shkak të indiferencës, sepse njerëzit, të zënë
siç janë me njëmijë punë, të cilat u duken më të rëndësishme se feja, krijojnë një
vizion vetëm horizontal të jetës. Nuk janë në gjendje t’i lartojnë sytë nga qielli
e ta shikojnë Krishtin e ngjallur. Është pikërisht Ngjallja, që na hap udhën e jetës
sonë e të jetës së ardhshme në botën e amshuar të Zotit, në lumturinë e plotë, me
sigurinë se njeriu mund të fitojë mbi të keqen, mbi mëkatin, mbi vdekjen. E kjo na
ndihmon t’i jetojmë më me besim e t’i përballojmë më me guxim e shpresë, ngjarjet
e përditshme. Ngjallja e Krishtit, ripohoi me forcë Papa Françesku, ndriçon me
një dritë të re ngjarjet e jetës së e përditshme.