Pashkët në Tokën Shenjte. Patriku Tual: Zoti hapi një shteg në mes vuajtjes sonë
Pashkët po jetohen në një atmosferë të thellë shpirtërore në Tokën e Jezusit, ku është
tepër e fortë etja për paqe e për shpresë, siç u shpreh edhe Papa në mesazhin e tij
të Solemnitetit, drejtuar Romës e Botës.
Sot Bazilika e Varrit të Shenjtë
ishte plot me shtegtarë. Të gjithë sytë ishin mbërthyer te Varri i zbrazët, përballë
të cilit u kumtua fitorja e Krishtit mbi vdekjen. Janë Pashkët e Jeruzalemit. Imzot
Tual, patrik i Kishës latine, kryesoi Meshën solemne, pikërisht në vendin ku u ngjall
Zoti. Në përfundim, procesioni u rrotullua rreth Varrit të Shenjtë, duke kënduar e
duke kujtuar, në katër pika kryesore, Ungjijtë përmes të cilëve rijetohen ngjarjet
e Ngjalljes. Duke u nisur nga vendi ku ndodhi gjithçka, lajmi i mirë dëshiron të përshkojë
Planetin, deri në skajet më të harruara. Në agun e Pashkëve, shpresa nuk njeh më
kufij, tha patriku Tual në homelinë e solemnitetit, kryqet e jetës sonë nuk janë zhdukur,
po Hyji hapi një shteg në mes të vuajtjes sonë e dëshiron të na hapë shtigje të reja
ditë për ditë. Imzot Tval kujtoi edhe Papën Françesku, duke i përsëritur ftesën
për të vizituar Tokën e Jezusit, ashtu si të gjithë shtegtarët.
Nga Jeruzalemi,
përmes mikrofonit tonë, urimi i Rojtarit të Tokës së Shenjtë, atë Pierbatista Picabala
u drejtohet mbarë njerëzve vullnetmirë, e edhe shqiptarëve, që tashmë nuk mungojnë
në Tokën, ku vdiq e u ngjall Zoti:“Kuptimi i Pashkëve është gjithnjë i njëjtë
e megjithatë, gjithnjë i ri. Jezusi, që ngjallet, lind për një jetë të re e e përtërin
jetën tonë. Uroj që pavarësisht nga vështirësitë e problemet, që e trazojnë jetën
e të gjithëve, të bëhemi njerëz të rinj, të përtërirë nga dashuria e Krishtit”.