По повод празник Воскресение Христово - Велигден, Скопскиот бискуп и Апостолски егзарх
во Македонија, монс. д-р Киро Стојанов упати честитка до верниците од католичка вероисповед
и сите луѓе со добра волја, која ја пренесуваме во целост:
********* Браќа
и сестри, Велигден е. Празник кој е врв на сите празнувања во црковната година. Таинството
на човековото спасение е централно таинство на човековата историја. Сите се среќаваме
со границата на човековата егзистенција која се појавува за нас по непознат пат и
која исчезнува не по наша желба. Така човекот останува загатка за себе и другите.
Исто така, прашањето, не само за животот, туку и проблемот на злото во светот и тешкотиите
кои судбински не пратат, остануваат без одговор со кој би се исполнил човекот. Затоа
човекот во наше време бега во две крајности: едната е религиски фундаментализам, каде
се избегнува „да се прави за верата и според верата“, туку се препушта на Бога и Божественоста.
Другата крајност е: да се живее како Бог да го нема. Едниот и другион став води во
атеизам. Сепак, човек без Бога нема смисла и не може да живее како да го нема. За
Велигден христијанската заедница го набљудува централниот космички настан за човекот
а тоа е неговата побожанственост. Тоа значи дека човекот е средиште на создавањето
и христијанското навестување и дека е возљубено Божјо создание. Не бегаме од другите
сознанија дека човекот е грешно создание. Изворот на сите зла не е во природата туку
се раѓа во човековото срце. Тоа што Велигден го славиме е факт дека тој грешен човек,
како најубаво Божјо создание од гревот ослободен и спасен е повикан на нов живот.
Новиот живот е промена на срцата а не само на ставовите. Велигден го води погледот
на човекот кон воплотениот Син Божји, кој стана човек, кого човечката злоба го доведе
до трагичната смрт на крстот, но воскреснат е во тело кое не е потчинето на нашите
физички закони и со тоа е поставен темел за секој верник и човек со добра волја дека
димензијата на животот е отворена кон бесконечното блаженство. Така, Воскреснатиот
Исус Христос, е средиште на историјата, извор на надежта и дека човекот е повикан
на најголемо достоинство. На сите оние кои размислуваат за тајната на животот и смртта
сакам да им порачам дека смртта е победена а со тоа и злото по Исус Христос Воскреснатиот
господар на историјата.
Нека во тие мисли ви биде среќен и благословен празникот
на Христовото Воскресение. Христос Воскресе!