Кардынал Дзівіш пра перспектывы кананізацыі Яна Паўла ІІ і новага Папу
“Было б цудоўна, каб
кананізацыя бл. Яна Паўла ІІ адбылася ў Год веры, або да канца лістапада 2013 г.”,
- такое меркаванне выказаў арцыбіскуп Кракаўскі, кардынал Станіслаў Дзівіш. У інтэрв’ю
італьянскай “La Stampa” іерарх адзначыў, што быў бы рады, каб кананізацыйную св. Імшу
цэлебраваў папа Францішак, бо ён падчас свайго пантыфікату будзе несумненна наследаваць
Яна Паўла ІІ: знішчыць муры, шырока адчыніць дзверы Касцёла для ўсіх і наблізіць свет
да Хрыста. Паводле іерарха, цяперашні Пантыфік мае падобны да Яна Паўла ІІ спосаб
камунікацыі з людзьмі: паважае пратакол, але любіць гаварыць спантанна, простай і
яснай мовай, і гэтым, паводле былога асабістага сакратара Яна Паўла ІІ, узбуджае сімпатыю
да сябе.
Кардынал Дзівіш нагадаў, што будучы кардыналам Вайтыла змагаўся з
камуністычным экстрэмізмам, а Берголія са скажэннямі “Тэалогіі вызвалення”. Ні Ян
Павел ІІ, ні папа Францішак ніколі не прызнавалі, што марксізм можа вырашыць сацыяльныя
праблемы свету. Арцыбіскуп Кракаўскі параўнаў таксама рэакцыю двух Пантыфікаў у бок
пурпуратаў пасля абрання на Пасад св. Пятра. “Кардынал Берголіа сказаў: няхай Бог
вам прабачыць за тое, што вы зрабілі!” , а кардынал Вайтыла ў 1978 г.: Што вы нарабілі?”.
“Сэнс і іронія такія ж”, - заўважыў іерарх.
Гаворачы аб апошніх падзеях у Ватыкане,
кардынал Дзівіш адзначыў патрэбу змен у Рымскай курыі, але яе праблемы шмат у чым
перабольшаны СМІ. Тыя, хто там працуе, паводле былога асабістага сакратара Яна Паўла
ІІ, гэта добрыя і падрыхтаваныя людзі. Кардынал Дзівіш выказаў надзею, што папа Францішак
падтрымае яго намаганні, каб наступная Сусветная сустрэча моладзі адбылася ў Кракаве
ў 2016 г., калі Польшча будзе святкаваць 1050-годдзе прыняцця хросту.