Kisha do të ketë së shpejti 63 të Lumë të rinj, martirë të kohës së komunizmit e të
nazizmit
Papa Françesku autorizoi dje Kongregatën për Çështjet e Shenjtorëve të bëjë të njohur
dekretet për shpalljen e 63 të Lumëve e 7 Shërbëtorëve të rinj të Zotit. Ndër ta,
dallohen martirët e Luftës Civile spanjolle, ata të regjimeve komuniste të Evropës
Lindore dhe të nazizmit. Veçojmë të riun seminarist italian Rolando Rivi, vrarë barbarisht
nga partizanët në vitin 1945. Akoma adoleshent, në moshën 14 vjeçare, u martirizua
duke dëshmuar dashurinë e tij të pamatë për Jezu Krishtin, si shumë meshtarë, murgesha
e laikë shqiptarë gjatë komunizmit. Ndër të lumët e rinj është pikërisht një
shqiptar, pavarësisht se i lindur në Stamboll të Turqisë, më 25 dhjetor 1873 e
martir në Bukuresht të Rumanisë, më 16 maj 1954. Dekreti njeh martirizimin e Shërbëtorit
të Zotit Vladimir Gjika, meshtar dioqezan. Familja e tij,
e mirënjohur në Shqipëri, e ka origjinën nga Përmeti, nga ku është larguar në vitet
1500-1600 për t’u vendosur në lagjen Fanar të Kostandinopojës. Gjatë sundimit të perandorisë
osmane, të ndihmuar nga pashallarë shqiptarë në oborrin e Sulltanit, anëtarët e kësaj
familjeje qeverisën si princa, për vite me radhë Moldavinë dhe Vllahinë. Por i dhanë
botës edhe njerëz të kulturës, si për shembull, Elena Gjikën, apo Dora d’Istria. Nga
kjo familje rrjedh edhe mons. Vladimir Gjika, i cili lindi si princ ortodoks, për
t’u shuguruar meshtar katolik, në moshën 50-vjeçare. Deri atëherë, ai mori pjesë aktive
në jetën shoqërore e politike të Rumanisë gjatë Luftës I Botërore e punoi shumë për
bashkimin e vendit, në Paris, Romë e Vatikan, si delegat i Këshillit Kombëtar Rumun. Pas
vitit 1923, kur u shugurua meshtar, Vladimir Gjika u dërgua nga Kisha Katolike në
Sidnej të Australisë, në Budapest, në Dublin e Buenos Aires, ku mori pjesë në kongrese
eukaristike ndërkombëtare. Gjithashtu, ndërmori misione kishtare në Japoni, Kinë e
në Cejlon. Bekonte gjithnjë me një nga gjembat e kurorës së Jezusit e ndër mrekullitë,
që i atribuohen ndërhyrjes së tij, është shërimi i shumë njerëzve dhe lindja e trashëgimtarit
të fronit japonez. U shua, në vitin 1954, në një burg komunist të Rumanisë, për shkak
të torturave të “Securitate”-s, dokumentuar nga vetë martirizuesit e regjimit, por
edhe nga dëshmitë e shokëve të burgut. Është jashtëzakonisht i njohur dhe i marrë
si shembull për frymën e tij ekumenike. Thoshte se ishte bërë katolik, për të qenë
ortodoks më i mirë. Dëshironte me gjithë shpirt bashkimin e Kishës Katolike me Kishën
Ortodokse. Papa Piu XI, pasi e pati emëruar “protonotar apostolik” në vitin 1931,
duke bërë shaka me të, por duke vënë në dukje impenjimet e tij të shumta ungjillëzuese
në të gjithë botën, e quante “vagabondi i madh apostolik i shekullit XX”. Fillimisht
në Paris, ku ndenji në një barakë të vetmuar, në mes të të varfërve, duke fituar shpirtra
për Zotin e pastaj, në rektoratin për të huajt, që i ofroi kryeipeshkvi i kryeqytetit
francez, mons. Gjika dinte t’u fliste e të ndihmonte si më të ligështit e shoqërisë,
ashtu edhe më fatlumët e pasur, tek të cilët shihte nevojën që kishin për t’i dhënë
kuptim jetës. Zhak Mariten, Pol Klodel, Henri Bordò, Fransua Moriak, njerëz të tjerë
të kulturës e të artit qenë miqtë e tij, së bashku me refugjatët politikë, të persekutuarit
e të mënjanuarit. Shkruan e lexohet, flet e dëgjohet nga ata, që mahniten me katolicizmin
e tij, vërtet i madh, sublim, hyjnor; mrekullohen nga Jezusi, që nuk u paraqitet si
përrallë fëmijësh, por si e Vërteta Absolute dhe e amshuar. Në vitin 1939 kthehet
në Rumani për t’u takuar me të afërmit e vendos të qëndrojë aty, pasi sheh sprovat,
që i duhet të kalojë vendi, fillimisht për shkak të luftës e pastaj, për shkak të
komunistëve. Në vitin 1948, mbreti i ri Mihail dëshiron ta marrë me vete, në Evropën
e lirë, larg persekutimit, por ai nuk pranon, i bindur se po shkonte nën kudhrën e
hekurt të drapërit e çekanit. Policia e Çausheuskut i hoqi së pari, të drejtën për
t’u larguar nga shtëpia, sepse “ajo që bënte e predikonte, ishte shumë e rrezikshme
për revolucionin”, e pastaj e arrestoi më 19 nëntor 1952. Gjykata e të pafeve, megjithëse
ishte tashmë 80 vjeçar e dënoi me 30 vjet burgim. Kështu, mbërriti ora e flijimit
suprem: më 17 maj 1954, pas shumë torturash të tmerrshme, siç mund të ishin të aftë
vetëm komunistët, Mons. Vladimir Gjika u dha fund vuajtjeve për të shkuar tek Ati
Qiellor. Zhak Mariten pati thënë për të: “Princ në botë e për një thirrje më të lartë,
Meshtar i Krishtit”. Tani martir, në nderimet e elterit!