ՉԱՐՉԱՐԱՆՔ ՔՐԻՍՏՈՍԻ՝ ՓՐԿՈԻԹԻԻՆ ՄԱՐԴԿԱՆ

Յիսուսի աշխարհ գալուստը յեղաշրջեց մարդկութեան պատմութիւնը՝ դարձուց իր սկզբնական շնորհքի վիճակին : Անոր ծնունդը, մահն ու յարութիւնը, կարելի չէ նմանցնել անձնական արկածախնդրութեան մը լոկ որ արժէք մը չունի իր ժամանակէն դուրս եւ կը թողու մարդիկը անտարբեր, այլ ամէն մարդու կեանքը կամ մահը, երջանկութիւնը կամ կորուստը, կախում ունին այդ դէպքին նկատմամբ իրենց բռնած դիրքէն :
Այս պատճառով Աստուած աշխարհ ղրկեց իր Որդին «Ոչ թէ դատապարտելու համար մարդիկը, այլ զանոնք փրկելու» :
Մարդկային խելքը երբէք պիտի չընդունէր որ մարմնացեալ Յիսուս Քրիստոսը չարչարուած եւ մահացած ըլլար խաչին վրայ :
Հակաքրիստոնեայ Բ. դարու փիլիսոփան՝ Քելսը, ծիծաղելով կը յայտարարէր թէ անկարելի է որ Աստուած մարմին կրնար ունենալ քու մարմնոյդ պէս, չի կըրնար ճաշակել նոյն կերակուրէն որ դուն կը ճաշակես, եւ այդ արիւնը որ հոսեցաւ իր մարմնէն կը նմանի՞ արդեօք քու արեանդ... եթէ իսկապէս Աստուծոյ որդի էր ինչու՞ հայրը զինքը չկրցաւ ազատել այդ չարչարանքներէն ու մահէն... այս գաղափարը ընդունուեցաւ Բ. դարուն շատ մը պատմաբաններէն որովհետեւ իրենց համար Աստուած չարչարանքի ենթակայ չէր կրնար ըլլալ :
Բայց ասոնց պատասխանելով՝ Որոգինէսը կը պատասխանէ. «Փրկիչը աշխարհ եկաւ մարդկութիւնը փրկելու եւ մեր չարչարանքները կրեց խաչի չարչարանքներն ընդունելէ աոաջ... սիրոյ չարչարանքն էր այդ :
Աստուծոյ չարչարանքը չի նմանիր մարդկային մեր չարչարանքներուն, աստուածային եւ հոգեւոր չարչարանք է որ ոչ անուն եւ ոչ ալ տեղ ունի մեր մէջ, որովհետեւ մեր չարչարանքներուն մէջ քիչ մը անձնասիրութին կը գտնենք, մինչ Աստուծոյ չարչարանքին մէջ՝ միայն անչափ անսահման սէր կայ : Այսպէսով, հազիւ Աստուած մարմնացաւ, ինքնաբերաբար չարչարանքի աշխարհին մէջ մտաւ :
Մեր կեանքին մէջ, յաճախ կը նախընտրենք խաւարը լոյսին, կը խորհինք ու կը գործենք այնպէս իբրեւ թէ Յիսուս գոյութիւն ունեցած չըլլար :
Ո՞վ ունինք Խաչեցեալէն զատ. ան իր չարչարանքներով՝ մեզ մասնակից դարձուց Եկեղեցւոյ եօթը խորհուրդներուն :
- Մկրտութեամբ կը մասնակցինք Քրիստոսի մահուան :
- Դրոշմը մեզի պէտք եղած շնորհքը կու տայ չարչարանքները կրելու եւ պայքարելու Աստուծոյ արքայութեան համար:
- Ապաշխարանքը մեզ մասնակից կը դարձնէ Քրիստոսի չարչարանքներուն :
- Սուրբ Հաղորդութեամբ՝ մեր կեանքը կը դառնայ զոհը Հօր Աստուծոյ :