Papa Françesku na dorëzon shpresën në Jezusin: dëshmia e një vajze të re në Meshën
e së Dieles së Larit.
“Mos lejoni t’jua grabisin shpresën”: është një nga fragmentet e forta të homelisë
së Papës Françesku, në kremtimin e së Dielës së Larit. Thirrje, që iu drejtua posaçërisht
të rinjve, në një kohë të rëndë, kur në gjirin e breznive të reja ndjehet fort kriza
e shpresave. Me mikrofonin tonë iu afruam Mikela Rinaldit, e re, që impenjohet
në punën baritore me të rinjtë, në Romë:
Përgjigje: - Papa
Françesku na kujtoi se i krishteri nuk mund të jetë i trishtuar, sepse gëzimi i tij
lind nga takimi me Krishtin. E është pikërisht kështu, sepse nga ky takim lind një
dashuri aq e madhe, aq e pafundme, që ta ndryshon jetën deri në atë pikë, sa të mos
e ndjesh më veten vetëm e të pushtohesh nga një forcë e jashtëzakonshme.
Pyetje:
- Si e mendoni se mund t’u kumtohet edhe të tjerëve kjo shpresë, në një botë,
ku shumë të rinj e kanë humbur gazin e moshës, për të mos folur për dëshpërim…
Përgjigje:
- Po, ashtu është: sipas meje, themelore është fjala e dytë, që na dorëzoi
Papa Françesku, lidhur pikërisht me gëzimin e krishterë, që është Kryqi. Gëzimi e
Kryqi janë të pandashëm. Pak kohë më parë lexova një frazë, që më mbeti e skalitur
në mendje: “Gëzimi i krishterë është trishtim i kapërcyer”. Kjo nuk do të thotë se
i krishteri s’ka probleme ose se i përballon mendjelehtësisht. Ishte zbulim i jashtëzakonshëm
për mua. Më ndihmoi shumë ta kuptoj ç’do të thotë, në të vërtetë, gëzim i krishterë.
Trishtimet tona, plagët tona, shqetësimet tona, e përditshmja jonë lahen me gjakun
e Krishtit. Zoti nuk ta heq dhimbjen, por e shndërron; e është e jashtëzakonshme,
sepse prej këtu lind gëzimi, prej ndjesisë se Zoti po të ngushëllon, po të shpëton.
Pyetje:
- Papa Françesku nënvizoi, ndërmjet tjerash, se Kryqi i Krishtit duhet rrokur
me dashuri….
Përgjigje: - Pikërisht në këto ditë të Javës
së Madhe, Jezusi arrin në fund të udhës së jetës, edhe Ai, i rraskapitur, i vrerosur.
Po gjesti i fundit, që bën, edhe pse para syve tanë është absurd e paradoksal, është
ai i dhurimit të vetvetes: nganjëherë ne e ngatërrojmë dashurinë me lumturinë, por
nuk është kjo, që kishte në mendje Jezusi. Sepse Dashuria, e vërteta, kalon përmes
Kryqit e jeta na u dhurua pikërisht që të nxëmë të dashurojmë. Duhet të rropatemi
një jetë të tërë, por kuptimi i fundmë i Ungjillit është të duash! Na e thotë Jezusi,
e na e rikujton Papa Françesku në çdo rast.
Pyetje: - Edhe të dielën,
siç është mësuar tashmë, Papa, si bari i mirë, deshi të përshëndesë e të përqafojë
sa më shumë njerëz. Ç’emocion ju shkaktoi kjo sjellje?
Përgjigje: -
Emocion jashtëzakonisht të madh. Të gjitha herët, Papa Françesku duket atë i dashur,
që e gjen gjithnjë një fjalë të mirë për t’u dhënë zemër bijve të vet, një gjest kuptimplotë,
për t’i gëzuar. E kështu i bën të gjithë për vete. Përveç ëmbëlsisë, kur dëshiron
të nxisë ose të kërkojë ndonjë gjë, që e ka vërtet për zemër, nis me fjalën “Ju lutem!”.
Edhe të Dielën e Larit e bëri këtë, apo jo? “Ju lutem, mos lejoni t’jua grabisin
shpresën!”. Mund ta quajmë pra, atë të dashur, në fjalë e në gjeste.