Papa Françesku do të vazhdojë të banojë në Domus Sanctae Marthae
Papa Françesku do të vazhdojë të banojë në Shtëpinë e Shën Martës në Vatikan e tani
për tani, nuk ka ndërmend të shkojë në Apartamentin papnor. Lajmi u bë publik nga
drejtori i Sallës së Shtypit të Selisë së Shenjtë, atë Federiko Lombardi. Ta dëgjojmë,
në mikrofonin tonë: Në përfundim të Meshës së mëngjesit të sotëm, Ati i Shenjtë,
me fjalë të thjeshta, na la të kuptojmë se – të paktën në këtë fazë – dëshiron të
banojë me të tjerët në Domus Sanctae Marthae. Papa është zhvendosur nga dhoma ku qëndronte
gjatë Konklavit, në një ambient më të madh, ku zakonisht qëndrojnë miq me rëndësi.
Aty ka më shumë mundësi të presë me lehtësi njerëz, duke pasur në dispozicion një
hapësirë më të gjerë. Për audiencat, për veprimtaritë normale të paradites – si takimet
me grupe, pritjet e vizitorëve të rëndësishëm e kështu me radhë – përdor, që prej
disa ditësh, apartamentin e audiencave papnore në katin e dytë të Pallatit Apostolik,
ku ndodhen Salla Klementine, Biblioteka private dhe ambiente të tjera për veprimtarinë
zyrtare të Atit të Shenjtë. Por, si banesë, konsideron Shtëpinë e Shën Martës.