Papa Françesku i bën urimet Kryerabinit të Bashkësisë hebraike të Romës, Rikardo Di
Senji, me rastin e “Pezah”, Pashkëve hebraike, që kremtohen nesër, më 26 mars. “Zoti
i Gjithpushtetshëm, që e çliroi popullin e vet nga skllavëria e Egjiptit, për ta udhëhequr
drejt Tokës së Premtuar – shkruan Ati i Shenjtë – ju liroftë nga çdo e keqe e ju shoqëroftë
me bekimin e Vet. Ju kërkoj të luteni për mua – vazhdon Papa – ndërsa unë ju siguroj
për lutjen time, duke shpresuar në thellimin e lidhjeve të vlerësimit e të miqësisë
së ndërsjelltë”. Në Mesazh, Horhe Mario Bergolio, falenderon sërish Kryerabinin
për praninë e tij dhe të anëtarëve të tjerë të shquar të Bashkësisë hebraike në Meshën
për fillimin e shërbimit papnor. Siç shkruhet në faqen e internetit të Bashkësisë
hebraike të Romës, kryerabini ka mbetur tejet i kënaqur nga urimet dhe do ta falenderojë
Papën gjatë orëve të ardhshme, duke i bërë urimet për Pashkët katolike.