Dolën sot në librari, meditimet për Udhën e Kryqit të së Premtes së Madhe 2013.
Në libraritë, që sot, mund të gjinden meditimet për Udhën e Kryqit të së Premtes së
Madhe 2013, shkruar nga të rinjtë e Libanit, nën drejtimin e kardinalit Béhara Butros
Rai, shtypur nga Shtëpia Botuese e Vatikanit (LEV). “Cila është udha për jetën
e pasosur? Jezusi iu përgjigj kësaj pyetjeje, që na përvëlon deri në thellësitë e
shpirtit tonë, duke përshkuar Udhën e Kryqit”. Nisin me këto fjalë, meditimet, që
do të lexohen në Koloseum më 29 mars, të Premten e Madhe, gjatë ritit të Udhës së
Kryqit, kryesuar për herë të parë nga Papa Françesku. Stacionet shoqërohen me ilustrime,
marrë nga një Udhë Kryqi e shekullit XIX, që ruhet në Betlehem, realizuar nga një
zejtar françeskan palestinez. Të shumta janë, në tekst, citimet nga Nxitja Apostolike
pas-sinodale e Benediktit XVI “Kisha në Lindjen e Mesme” si dhe citimet nga Shenjtorët
e Lindjes e nga liturgjia lindore (kaldeje, kopte, maronite, bizantine). Thirrja për
të ndjekur Zotin u drejtohet të gjithëve, posaçërisht të rinjve dhe njerëzve të munduar
për shkak të përçarjeve, padrejtësive, që luftojnë për të qenë, ndërmjet vëllezërve
të tyre, shenja shprese e veprimtarë të paqes, siç lexohet në hyrjen e Udhës së Kryqit. Të
gjithë besimtarët e mbarë botës do të mund ta ndjekin përmes Mondovizionit, të Premten
e Madhe, duke nisur nga ora 21.15.