Улады Бразіліі і архідыяцэзія
Рыа-дэ-Жанейра шчыльна супрацоўнічаюць у падрыхтоўцы да Сусветных дзён моладзі, якія
пройдуць тут летам 2013 г., паведаміў у інтэрв’ю нашаму радыё кс. Анісіа Хасэ, дырэктар
па міжнародных сувязях сусветнага форуму. Святар адзначыў, што ўжо некаторы час таму
была апублікавана падрабязная праграма мерапрыемства з удзелам Бэнэдыкта ХVI, якую
з абраннем папы Францішка, магчыма, прыйдзецца змяніць. “Я ведаю, што арганізатары
моладзевага форуму працуюь над гэтым”, - прызнаўся прадстаўнік епіскапату Бразіліі.
Ён дадаў, што гэта звязана з тым, што Пантыфік жадае наведаць найбяднейшыя слаі бразільскага
грамадства, таму гэта, безумоўна, будзе адлюстравана ў праграме яго візіту.
Арганізатар
адзначыў, што Святы Айцец наведае славутую статую “Хрыста Адкупіцеля”, якая ўзносіцца
над Рыа-дэ-Жанейра. Аднак, яшчэ не вырашана ў якой форме: на фунікулёры, на машыне
або на верталёце, паінфармаваў кс. Хасэ. Па словах святара, Пантыфік прынясе ўдзельнікам
форума ў Рыа асноўнае пасланне: што яны патрэбныя грамадству. “Думаю, што гэта будзе
вялікі падарунак Папы для моладзі. Ян Павел ІІ быў Папам вобразу, харызматычным Папам,
Бэнэдыкт ХVI – Папам слова”, а Францішак будзе Папам знакаў, лічыць арганізатар форума.
Кс.
Хасэ паінфармаваў, што па дыяцэзіях краіны пілігрымуе Крыж Сусветных дзён моладзі,
разам з копіяй іконы “Maria Salus Populi Romani” (Марыя збаўленне рымскага народу),
наведаваючы таксама турмы, бальніцы і трушчобы, у якіх жывуць найбяднейшыя слаі грамадства.