Udha e Kryqit në Koloseum: dy fjalë për tekstet e meditimet.
Janë të rinjtë e Libanit ata, që menduan sivjet për meditimet e Udhës së Kryqit për
të Premten e Madhe të Pashkëve, në Koloseum të Romës. Atyre, nën drejtimin e Patrikut
të maronitëve të Antiokisë, kardinalit Behara Butros Rai, Benedikti XVI u pati kërkuar
të shprehnin, përmes stacioneve të Mundimeve të Krishtit, ankthet e shpresat e popujve
të Lindjes së Mesme. E kështu, në amfiteatrin Flavio, krishterimi do të njihet me
padrejtësitë, përçarjet ndërmjet të krishterëve, me fondamentalizmin e dhunën, që
peshojnë rëndë mbi shpirtin e mbi korpin e popujve të Lindjes së Mesme, por edhe me
vuajtjet e sëmundjet, që brejnë mbarë njerëzimin. Shtëpia Botuese e Vatikanit
do t’i botojë meditimet e Udhës së Kryqit të hënën e ardhshme.
“Shpresë e patundur,
fe e gjallë”: këto janë mjetet, që Udha e Kryqit i dorëzon të krishterit për të ecur
në një jetë të re. Nëse të meditosh udhën, përshkuar nga Krishti drejt Kalvarit do
të thotë të shikosh edhe të keqen e mëkatin, që plagos njerëzimin, atëhere meditimet
e shkruara nga grupi i të rinjve libanezë, nën drejtimin e patrikut të maronitëve
të Antiokisë, kardinalit Rai, do të tingëllojnë si përgjigje, dhënë paragjykimeve
e urrejtjes, që i bëjnë zemrat gur e çojnë në ndeshje fetare, por edhe padrejtësisë
pa skaj e dhunës pa mëshirë. Besimi në Zotin e ngre rishtas në këmbë njeriun e rrëzuar,
forca e Shpirtit Shenjt e mban gjallë, e bën një me vullnetin e Zotit e i mëson t’i
dojë të gjithë. Është kjo, përgjigjja e tokës së kedrave. I jepet atyre, që e dinë
ç’është vuajtja, diskriminimi, mohimi i të drejtave më fillestare.
Në amfiteatrin
romak Koloseum, në mbrëmjen e së Premtes së Madhe të Pashkëve, breznitë e reja të
Libanit do t’i kërkojnë botës më shumë respekt për lirinë fetare (Stacioni VII),
që fetë e ndryshme të mund të vihen së bashku për udhë, për t’i shërbyer së mirës
së përbashkët, për të dhënë ndihmesën e tyre në zhvillimin e të gjithë njerëzve si
dhe për ndërtimin e shoqërive të reja, plot shpresë. Do të sjellin në atë log mundimesh,
vuajtjet e popujve të Lindjes së Mesme. Në fytyrat e grave të Jeruzalemit, që
qajnë për Jezusin, do të mund të shikojmë gratë e ditëve tona, të plagosura në dinjitetin
e tyre e të shpërfytyruara nga diskriminimet (Stacioni VIII). Në barrën
e rëndë të mëkateve njerëzore - kryq, që e bën Jezusin të rrëzohet tri herë rresht
– plagën e atyre përçarjeve që, në gjirin e Kishës (Stacioni IX) i largojnë
të krishterët nga njëri tjetri. Do të mund të gjejmë realitetin bashkëkohor, në meditimet
e Udhës së Kryqit të të rinjve libanezë Por nuk mungojnë edhe lutjet e dala nga
shpirti, drejtuar Zotit: për ata që, duke i ngjarë Pilatit, i shërbejnë logjikës së
interesave të veta. Përkulen para presioneve politike e shoqërore. Dënojnë të pafajshmin,
për qejfin e turmës, pa iu bërë vonë se po i bien ndesh drejtësisë. E dorëzojnë Jezusin
në duart e kryqëzuesve, ndonëse e dinë mirëfilli se është i panjollë. Për ata, që
lajnë duart, pasi kanë bërë poshtërsitë më të neveritshme (Stacioni I). Lutje,
edhe për ata që përkulen para laicizmit të verbër, që ia zë frymën vlerave të fesë
e të moralit, në emër të mbrojtjes së njeriut. Në sa Zoti vijon të pësojë poshtërime,
të vuajë, të mundohet në njerëzit e ligësht e, sidomos, në Lindjen e martirizuar,
që i lutet ta ndihmojë, për të gjetur shpresën e humbur, të vërtetën e nëpërkëmbur,
dashurinë e harruar.
Në Udhën e Kryqit të të rinjve libanezë, nuk mungon as
fondamentalizmi i tërbuar, që pretendon se po mbron vlerat fetare, duke derdhur gjak
(Stacioni II), pasuar nga ftesa për të shikuar Krishtin, që bëhet një me të
ligshtit. E ftesa drejtuar popujve të poshtëruar e të vuajtur, posaçërisht atyre të
Lindjes së martirizuar, që ta mbartin pikërisht me Zotin, kryqin e tyre, duke marrë
jetë nga jeta e të Kryqëzuarit. Ndjehet fort, ndikimi i liturgjisë lindore në
çaste të ndryshme të Udhës së sivjetme të Kryqit, frymëzuar edhe nga Nxitja pas-Sinodale
e Benediktit XVI “Kisha në Lindjen e Mesme”. Në Stacionin XII, që kujton
vdekjen e Jezusit mbi kryq, i lartohet Zotit lutja plot përdëllim për të gjithë ata,
të cilët praktikojnë abortin, eutanazinë që të heqin dorë nga kultura e vdekjes e
të marrin pjesë në ndërtimin e qytetërimit të jetës e të dashurisë. Së fundi, Varrimi
i Jezusit, që na çon në heshtimin e së Shtunës së Madhe e në hapjen e një plase të
ndritshme mes reve të përgjakura: “O Zot Jezus, premto të jemi bij
të dritës që nuk tremben nga errësira. Të lutemi sot, për
të gjithë ata, që kërkojnë kuptimin e jetës, e për ata, që i kanë humbur
shpresat, që të besojnë në fitoren tënde mbi mëkatin e mbi vdekjen”. Tragjedia
e Kryqit – shkruante kardinali Bergoglio në Mesazhin e Kreshmëve, vijon në rrugët
tona, në shtëpitë tona, në zemrat tona. Bashkëjetojmë me urrejtjen. Me dhunën, që
vret, që rrënon shpirtra e familje, ndez luftëra e konflikte, në zemra e në troje.
Bashkëjetojmë me zilinë e keqe, me urrejtjen, me shpifjen, me etjen për pasje në zemrat
tona. Vuajtja e njerëzve të pafajshëm është shuplakë mbi fytyrat tona; shuplakë, perandoria
e parasë, me pasojat e saj djallëzore, si droga, korrupsioni, kontrabanda, deri shitblerja
e njerëzve. E grusht, mjerimi material e moral, që përdoret në tregjet e sotme
si monedhë shkëmbimi. Skenë e dhimbshme, ku merr fund dinjiteti i punës, ku përligjet
egoizmi i më të fortëve, që nuk janë aspak më të mirët e ku mungesa e vlerave etike
krijon metastaza në gjirin e shoqërisë. I shikojmë, të pafuqishëm për t’iu kundërvënë
mëkatit që e plagos korpin tonë, me të gjithë forcën e pushtetit të tij shkatrrimtar”.Edhe
kjo botë ndjehet fort në udhën e Kryqit, por jo pa shpresën që hap e Diela e Ngjalljes!