Իսրայէլի Մէջ «Ամերիկեան-Իսրայէլեան Յարաբերութիւնները Յաւերժական Են» Շեշտեց Օպամա
Միացեալ Նահանգներու նախագահ Պարաք Օպամա երէկ պաշտօնական այցելութեամբ մը ժամանեց Իսրայէլ,
ուր դիմաւորուեցաւ Իսրայէլի նախագահ Շիմոն Փերեսի եւ վարչապետ Պենիամին Նեթանիահուի կողմէ: Պեն
Կորիոնի օդակայանին մէջ Նեթանիահու բարի գալուստի խօսք ուղղեց Օպամային եւ շնորհակալութիւն
յայտնեց անոր, որ Ուաշինկթըն կը զօրակցի իր գոյութիւնը պաշտպանելու Իսրայէլի իրաւունքին: «Շնորհակալ
ենք, որ այս զգայուն եւ պատմական հանգրուանին դուք կը զօրակցիք Իսրայէլին: Շնորհակալութիւն,
որ Միացեալ Նահանգներ կը զօրակցին իր գերիշխանութիւնը պաշտպանելու Իսրայէլի իրաւունքին»,
ըսաւ Նեթանիահու: Իր կարգին, Օպամա շեշտեց, որ Միացեալ Նահանգներ յանձնառու կը մնան
Իսրայէլի ապահովական կայունութեան: Ան շեշտեց, որ Միացեալ Նահանգներ առաջին պետութիւնն
էր, որ 65 տարի առաջ իբրեւ պետութիւն ճանչցաւ Իսրայէլը: Թել Աւիւի մէջ, Օպամա հանդիպում
մը ունեցաւ Փերեսի հետ: Քննարկուեցան շրջանային իրադարձութիւնները, ինչպէս նաեւ ամերիկեւիսրայէլեան
յարաբերութիւնները: