Takimi i atë Lombardit me gazetarët: “Unaza e Papës nuk do të jetë e artë”.
Drejtori i Sallës vatikanase të Shtypit, atë Federiko Lombardi, mbajti sot takimin
e zakonshëm me gazetarët, në Media Center. Kujtoi se sot Papa e kaloi drekën me presidenten
e Argjentinës, Cristina Fernandez de Kirchner, pas takimit privat, në Shtëpinë e Shën
Martës, që zgjati 15-20 minuta. Pastaj Papa përshëndeti edhe anëtarët e delegacionit
të Argjentinës. Dy takime të tjera, ishin: sot paradite, ai me Sekretarin e Shtetit
të Vatikanit, kardinalin Tarçizo Bertone, ndërsa dje pasdite, me atin e përgjithshëm
të Jezuitëve, Adolfo Nicolàs. Siç dihet, kujtoi atë Lombardi, Papa i ka konfirmuar
të gjithë në detyrat e mëparshme. Nesër, në tremen para Bazilikës së Shën Pjetrit,
Mesha e fillimit të papnisë. Në të djathtë, shpjegoi atë Lombardi, do të kemi personalitetet
kishtare, kryeipeshkvij e ipeshkvij, me bashkëkremtuesit e edhe, shumë ndoshta, delegacionet
e Kishave dhe bashkësive të tjera të krishtera. Më të djathtë, delegacionet e vendeve
të ndryshme, kryesuar nga presidentë, ministra e kështu me radhë. Në Shesh, poshtë
tremes, pranë shtatores së Shën Pjetrit, në të majtë, ka shumë mundësi të jenë delegacionet
e feve të tjera, hebrenj, myslimanë, si dhe priftërinjtë e seminaristët: flitet për
rreth 1.200 vetë. Ndërsa në të djathtë, përballë shtatores së Shën Palit, do të jetë
Trupi Diplomatik si dhe autoritete të tjera. Pjesa tjetër e Sheshit u përket të gjithë
njerëzve, që duan të jenë të pranishëm. Papa do të dalë nga Shtëpia e Shën Martës
rreth orës 8.45 e do të bëjë një rrotullim rreth Sheshit, për t’u takuar me besimtarët.
Pastaj do të shkojë në sakresti, pranë elterit të Zojës së Dhimbshme, ku do të përgatitet
për kremtimin, që do të nisë në orën 9.30. Për televizionet, Qendra Televizive e Vatikanit
do të japë pamje që nga ora 8.50. Kremtimi i nesërm titullohet: Fillimi i ministerit
petrin i ipeshkvit të Romës”, shkurt, fillimi, ose përurimi i papnisë. Është Mesha
e fillimit solemn të shërbimit të Papës, që është ipeshkvi i Romës. Quhet ‘petrin’
sepse lidhet me Shën Pjetrin. Papa është pasardhës i Shën Pjetrit. Ka shumë rëndësi,
vendi ku do të fillojë kremtimi: mbi Varrin e Shën Pjetrit, në qendër të Bazilikës,
që është edhe vendi i martirizimit të Shën Pjetrit, pasardhës i të cilit është Papa. Nga
sakrestia, Papa do të shkojë tek Varri i Shën Pjetrit, nën elter, i shoqëruar nga
patrikët dhe kryeipeshkvijtë e mëdhenj të Kishave lindore katolike, për të zbritur,
më pas, te Varri i Kryeapostullit. Këtu, ku ruhet unaza e palio, shenja të ministerit
petrin, të cilat do t’i dorëzohen Papës, do të kremtohet një rit: një homazh e një
lutje. Pastaj Papa, patrikët e kardinajtë, me procesion, do të përshkojnë bazilikën
e do të shkojnë drejt portës, për të dalë në treme, shoqëruar me himnin Lavde Mbretit:
Mbreti është Krishti. Në këtë këngë lavdërimi, kujtohen shumë shenjtorë, edhe disa
shenjtorë papë, pas Apostujve. I fundmi është Shën Piu X. Procesioni do të dalë
nga porta e majtë e Bazilikës e ritet para, para se të fillojë Mesha, do të jenë:
papës do t’i dorëzohen palio e unaza, dy shenjat kryesore të detyrës së tij. Palion
Papës do t’ia dorëzojë e do t’ia vërë mbi supe kardinali protodiakon, Jean-Louis Tauran,
pikërisht ai, që kumtoi lajmin e gëzuar “Habemus Papam” nga Lozha qendrore e Bazilikës
së Vatikanit. Është e njëllojtë me palion, që kishte Benedikti XVI, krejt e njëjtë.
Do të pasojë një lutje e bërë nga kardinali protopresbiter. Unazën do t’ia dorëzojë
kardinali dekan, Sodano. Tre kardinaj, të tre urdhërave, dorëzojnë palion, luten e
dorëzojnë unazën. Quhet “Unaza e Peshkatarit”, sepse Shën Pjetri ishte peshkatar
e Jezusi e bëri peshkatar njerëzish. Mbi unazë paraqitet Shën Pjetri me çelësat. Unaza,
punuar në argjend të praruar, është vepër e artistit të shquar italian, Enrico Manfrini.
Modelin ia paraqiti Papës, Mjeshtri i Kremtimeve. E Papa zgjodhi këtë model, ndërmjet
dy tre të tjerëve. Bashkëkremtues në Meshën e fillimit të Papnisë së Papës Françesku,
do të jenë të gjithë kardinajtë, që ndodhen në Romë e dëshirojnë të marrin pjesë në
kremtim: të pranishëm, edhe dy eprorët e përgjithshëm të urdhërave rregulltare: eprori
i përgjithshëm i Fretërve të vegjël, atë Carballo dhe ai i Jezuitëve, atë Nicolás.
Të tjerët do të jenë të pranishëm, por nuk do të bashkëkremtojnë. Riti i fundmë
është ai i “bindjes”: përfaqësuesit e kardinajve të pranishëm do të premtojnë se
do t’i binden plotësisht Papës së ri. Ndërsa përfaqësuesit e tjerë të Popullit
të Zotit, do ta bëjnë këtë premtim pas disa javësh, kur Papa do të shkojë në Bazilikën
e Shën Gjonit në Lateran. Pas këtyre riteve, do të fillojë Mesha: është Mesha solemne
e festës së Shën Jozefit. Një hollësi. Ungjilli do të këndohet në greqisht: në kremtimet
e mëdha, edhe për Pashkë, për shembull, ndiqet tradita e përdorimit të latinishtes
e edhe greqishtes, për të kujtuar Kishën e Lindjes e atë të Perëndimit, dy përmasat
e traditës së Kishës. Për thjeshtësi, në këtë Meshë, Ungjilli do të këndohet vetëm
greqisht, sepse gjatë Meshës ka shumë çaste, në të cilat do të përdoret latinishtja.
Një tjetër aspekt: në ritin e nesërm ofertat: buka e vera për Meshën, nuk do të sillen
në elter me procesion solemn. Kungimin nuk do ta japë Papa personalisht, por diakonët
dhe 500 meshtarë, që do të shpërndahen në Shesh. Homelinë Papa do ta mbajë në
italisht. Meshën do ta shoqërojë Kori i Kapelës Sikstine dhe Kori i Institutit
të Muzikës Kishtare Pas Meshe, Papa do të takohet me krerët e delegacioneve. Ka
shumë mundësi që Qendra Televizive e Vatikanit të japë pamjet në vazhdim. Me delegacionet
e Kishave të ndryshme të krishtera, pastaj, Papa do të takohet të mërkurën, në orën
11.00, ndërsa krerët e shteteve dhe delegacionet, që i shoqërojnë, Papa do t’i presë
në Sallën Klementine. Flitet se do të marrin pjesë 33 delegacione të Kishave e
konfesioneve të krishtera: 14 të Kishave lindore, 10 të Kishave të krishtera perëndimore,
3, të organizmave të krishtera ndërkombëtare. Do të jenë të pranishëm personalitete
shumë të rëndësishme: Patriku ekumenik, Bartolomeu I; katolikosi armen i Eçmiazinit,
Karekini II; metropoliti Hilarion i Patrikut të Moskës, e shumë të tjerë. Delegacioni
hebraik do të ketë 16 anëtarë të rabinateve të ndryshme. E pastaj do të jenë të pranishme
edhe delegacione të mëdha myslimanësh, budistësh, besimtarësh sikh, xhainistësh etj
etj, përfaqësues të mbarë botës.
Përsa u përket delegacioneve të vendeve të
ndryshme dhe organizatave ndërkombëtare, flitet për 132 përfaqësime të niveleve të
ndryshme. Rendi, që caktohet nga protokolli, vë në radhë të parë sovranët, pastaj
presidentët, pastaj kryeministrat e kështu me radhë. Praktika e Selisë së Shenjtë
nuk është të bëjë ftesa të veçanta. Selia e Shenjtë njofton për datën e Meshës së
fillimit të papnisë, e kush vjen, mirë se të vijë. Natyrisht, në krye të vendit
do të jenë delegacioni i Argjentinës e ai i Italisë.