Նորին Սրբութիւնը Արժէնթինի Ժողովուրդէն Խնդրեց Խնայել Ճամբորդական Ծախսերը Ի Նպաստ Աղքատներուն։
Վատիկանի Մամլոյ գրասենեակի տնօրէն` Հայր ֆետերիքօ Լոմպարտին, ուրբաթ 15 մարտի կէսօրին մամլոյ ելոյթի ընթացքին յայտարարած է թէ Արժէնթինայի առաքելական նուիրակ` գերապայծառ Էմիլ Փօլ Թչէրրինկ հրատարակած է հաղորդագրութիւն մը որուն մէջ կը հաղորդէ Նորընտիր Քահանայապետի հրաւէրը` Արժէնթինի հաւատացեալներուն, որ գահակալութեան արարողութեան առթիւ կը պատրաստուին ժամանելու հռոմ, մնալու իրենց բնակավայրերը եւ ճամբորդական ծախսերը խնայելու ի նպաստ չքաւորներուն։
Խօսելով հուսկ ֆրանչիսկոս Պապին լրագրողներու հետ նախատեսուած հանդիպման մասին, Հայր Լոմպարտին յայտնած է թէ ''լրագրողներու հետ այս հանդիպումը սովորութիւն մըն է որ սկիզբ առած էր ՅՊԲ Քահանայապետի օրով եւ զոր ֆրանչիսկոս Քահանայապետը ուզաց է շարունակել որպէս ''գնահատանք'' լրագրողներու մատուցած ծառայութեան ի սպաս Եկեղեցւոյ եւ Քահանայապետին։
Վատիկանի Մամլոյ գրասենեակի տնօրէնը ապա հաստատած է թէ ֆրանչիսկոս Քահանայապետը շաբաթ 23 մարտին կը հանդիպի Պենետիկտոս ԺԶ հետ։
| All the contents on this site are copyrighted ©. |