“Абаронца бедных і
найбольш патрабуючых”, - так Прэзідэнт ЗША ў спецыяльнай ноце акрэсліў новаабранага
Рымскага Пантыфіка. Для амерыканскага лідэра выбар Папы з Лацінскай Амерыкі дэманструе
сілу і вітальнасць гэтага рэгіёну, які грае ўсё больш важную ролю для свету. “Я з
адданасцю буду працаваць разам з Яго Святасцю на карысць міру, бяспекі і годнасці
кожнага чалавека, незалежна ад яго веры”, - напісаў Барак Абама. Таксама Канцлер Германіі
Анджэла Меркель звярнулася з віншаваннямі да Францішка. Яна пераканана, што многія
людзі, у тым ліку і некатолікі, чакаюць ад Пантыфіка новага імпульсу, не толькі ў
пытаннях веры, але і ў спрыянні міру, справядлівасці і ахове стварэння. Таксама французскі
лідэр Франсуа Аланд заявіў аб сваёй гатоўнасці весці дыялог даверу са Святым Пасадам.
Незвычайным чынам, праз “Твітэр”, павіншаваў Святога Айца прэм’р -міністр Вялікабрытаніі
Дэвід Кэмеран. Расійскі Прэзідэнт Уладзімір Пуцін пажадаў новаму Папе добрага здароўя
і выказаў упэўненасць у паспяховым працягу ўзаемадзеяння паміж Расіяй і Апостальскай
Сталіцай. Прэзідэнт Беларусі Аляксандр Лукашэнка таксама павіншаваў папу Францішка
з абраннем на Пасад св. Пятра. “Выказваю надзею, што добрыя адносіны, якія склаліся
паміж Рэспублікай Беларусь і Святым Пасадам, умацуюцца падчас Вашага Пантыфікату.
Мы будзем рады вітаць Вас на гасціннай беларускай зямлі, дзе адносіны паміж праваслаўнымі
і католікамі напоўнены духам ўзаемаразумення і супрацоўніцтва”, - напісаў ён