Папа Францішак пажартаваў да кардыналаў: Няхай Бог вам прабачачыць за тое, што вы
зрабілі
Імя новага Папы “Францішак”,
а не “Францішак І”. Гэта яшчэ раз падкрэсліў кс. Фэдэрыка Ламбардзі падчас брыфінгу
ў ватыканскім медыя-цэнтры. Ён удакладніў, што наступны Пантыфік з такім іменем будзе
“Францішкам ІІ”, але актуальны Папа завецца проста “Францішак”. Гаворачы пра падзеі
вечара 13 сакавіка, кіраўнік Залы Друку падкрэсліў, што падчас жэсту павагі і паслухмянасці
кардыналаў новаабранаму Папе ў Сікстынскай капэле, Пантыфік стаяў, а не сядзеў, як
гэта заўсёды адбывалася на мінулых канклавах. Кс. Ламбардзі звярнуў увагу на тое,
што папа Францішак з’явіўся на балконе лоджыі ватыканскай базылікі ў простай белай
сутане без чырвонай пелерыны і з крыжам, які насіў яшчэ будучы біскупам. Пасля ўдзялення
благаслаўлення “Urbi et Orbi” Святы Айцец паехаў у Дом св. Марты ў аўтобусе разам
з кардыналамі, а не ў асобнай машыне, якая была для яго падрыхтавана. Падчас святочнай
вячэры ў доме св. Марты, звяртаючыся да пурпуратаў, ён пажартаваў: “Няхай Бог вам
прабачачыць за тое, што вы зрабілі”. 14 сакавіка раніцай, падчас візіту ў базыліку
Санта Марыя Маджорэ, новы Папа ехаў без картэжа, толькі ў суправаджэнні адной машыны
ватыканскай жандармерыі. Тут ён усклаў на алтар сціплы букет з кветак і памаліўся
ў цішыні. Пасля візіту ў базыліку, Папа заехаў у дом, дзе жыў перад канклавам, каб
забраць некаторыя свае рэчы, падзякаваць персаналу і аплаціць рахунак.
Кіраўнік
Залы Друку паведаміў, што 14 сакавіка вечарам, пасля св. Імшы ў Сікстынскай капэле,
Святы Айцец наведае папскія апартаменты ў Апостальскім палацы, з дзярэй якіх будуць
зняты пячаткі.