Не выключана, што першы замежны візіт Францішка будзе ў Бразілію
Першая замежная паездка
папы Францішка можа адбыцца ў Бразілію, на Сусветныя дні моладзі ў Рыа-дэ-Жанейра.
Афіцыйны сайт галоўнай каталіцкай моладзевай падзеі абвясціў праз некалькі гадзін
пасля абрання Пантыфіка, што апошні сустрэнецца з маладымі людзьмі з усяго свету.
Да гэтага часу на інтэрнэт-рэсурсе паведамлялася аб удзеле ў мерапрыемстве Бэнэдыкта
XVI. Сусветныя дні моладзі пройдуць з 23 па 28 ліпеня 2013 г. На іх чакаецца ад двух
да трох мільёнаў чалавек. 11 лютага, у дзень абвяшчэння аб адстаўцы Бэнэдыкта XVI,
арцыбіскуп Рыа-дэ-Жанейра Арані Хоао Тэмпеста заявіў, што ён разлічвае на ўдзел у
моладзевым форуме наступнага Папы, бо прысутнасць на ім Наступніка св. Пятра з’яўляецца
сталай традыцыяй.
Падобная сітуацыя была ўжо ў найноўшай гісторыі Касцёла,
калі на Пасад св. Пятра ўступіў Бэнэдыкт XVI. Пасля смерці Яна Паўла II менавіта цяперашні
Папа на пенсіі паехаў замест яго на Сусветныя дні моладзі ў Кёльн летам 2005 г. Гэта
быў таксама першы візіт Пантыфіка ў яго родную краіну. Святы Пасад пакуль не пацвердзіў,
што Францішак прыедзе ў Рыа-дэ-Жанейра.