Deklarata e Eprorit të Përgjithshëm të Shoqërisë së Jezusit, atë Adolfo Nikolas, mbi
zgjedhjen e Papa Françeskut
Sot paradite, Eprori i Përgjithshëm i Shoqërisë së Jezusit, atë Adolfo Nikolas, bëri
të njohur për shtypin një deklaratë për zgjedhjen e sivëllait të tij jezuit, Jorge
Mario Bergoglio në fronin e Shën Pjetrit. “Në emër të Shoqërisë së Jezusit
– shkruan atë Nikolas – falenderoj Zotin për zgjedhjen e Papës së ri, kardinalit Jorge
Mario Bergoglio, S.J., që hap një rrugë plot shpresë për Kishën. Të gjithë
ne jezuitët e shoqërojmë me lutje vëllain tonë dhe e falenderojmë që pranoi me bujari
përgjegjësinë e drejtimit të Kishës në këtë çast të rëndësishëm. Emri “Françesk”,
me të cilin do ta njohim që nga dita e sotme, evokon frymën ungjillore të afërsisë
me të varfërit, që ka Ati i Shenjtë, indetifikimin e tij me njerëzit e thjeshtë dhe
impenjimin për rinovimin e Kishës. Që nga çasti i parë, kur doli para Popullit të
Zotit, dha një dëshmi të dukshme për thjeshtësinë, përvuajtërinë, përvojën baritore
dhe thellësinë shpirtërore të tij. “Aspekti dallues i Shoqërisë sonë është
se është… një shoqëri …e bashkuar me Papën e Romës me një lidhje të veçantë dashurie
e shërbimi” (Norma Plotësuese, n° 2, § 2). Prandaj, e ndajmë gëzimin me të gjithë
Kishën e, njëkohësisht, dëshirojmë të shprehim edhe një herë, gatishmërinë tonë për
t’u dërguar në vreshtën e Zotit, sipas frymës së kushtit tonë të veçantë të bindjes,
që na bashkon në mënyrë të veçantë me Atin e Shenjtë (Kongregacioni i Përgjithshëm
35, dekreti 1, Nr. 17)”.