Habemus Papam

Սիքստինեան Մատրան մէջ Պապընտիր Ժողովի - Քոնքլաւի - համար համախմբուած 115 կարտինալներու քուէարկութեամբ, չորեքշաբթի 13 մարտի երեկոյեան նիստի ընթացքին ընտրուեցաւ Տիեզերական Եկեղեցւոյ 266րդ Քահանայապետը յանձինս` Պուէնոս Այրէսի Արքեպիսկոպոս` Կարտինալ Եորկէ Մարիօ Պերկոլիոյ որ առաւ ֆրանչէսկոս Ա. անունը։

Սարկաւագ Կարտինալներու առաջինը` - Protodiacono-, նախասարկաւագը, Կարտինալ Ժան Լուի Թոռանը որ Միջկրօնական Երկխօսութեան Քահանայապետկան խորհուրդի նախագահն է, Սուրբ Պետրոսի կեդրոնական պատշգամէն, Սուրբ Պետրոսի հրապարակը խուժած տասնեակ հազարաւոր հաւատացեալներուն աւետեց նոր Քահանայապետի անունը. - բացագանչելով - Habemus Papam - Քահանայապետ մը ունինք բառերը։

''Ձեզի կ՛աւետեմ մեծ ուրախութիւն մը - ըսաւ Կարտինալը - Քահանայապետ մը ունինք, վսեմաշուք եւ մեծարգոյ Տիար Եորկէ Մարիօ Պերկոլիոյ (Հռովմէական Սուրբ Եկեղեցւոյ Կարտինալ որ կը ստանցնէ ֆրանչէսկոս Ա. անունը։

Այս խօսքէն ետք նորընտիր Պապը Սուրբ Պետրոսի կեդրոնական պատշգամէն յայտնուեցաւ աշխարհին մինչ Սուրբ Պետրոսի հրապարակի վրայ գտնուղ հազարաւոր հաւատացեալները խանդավառ ծափողջյոյններով դիմաւորեցին զինք։

Չորեքշաբթի 13 մարտի երեկոյեան ժամը 19,06-ին կ՛ընտրուեր 266րդ քահանայապետը։