Mesha pro Eligendo Pontefice. Kardinali Sodano: Zoti na dhuroftë një Bari tjetër të
Mirë.
U kremtua, sot paradite, në Bazilikën e Shën Pjetrit, “Missa pro Eligendo Romano Pontifice”,
kryesuar nga Kardinali Dekan, Anxhelo Sodano. Kremtimi nisi me procesionin e kardinajve,
shoqëruar nga antifona e hyrjes: “Zoti është forca e popullit të tij”. E pikërisht
mbarë populli i krishterë i botës i lutet, në këto orë, Shpirtit Shenjt, t’i frymëzojë
e t’i shndrisë kardinajtë, që janë të thirrur për të zgjedhur të 265-tin pasardhës
të Shën Pjetrit. Vetë kardinajtë u kanë kërkuar bashkësive të besimtarëve t’i shoqërojnë
me uratë në këtë çast vendimtar për jetën e Kishës katolike
Orë e rëndësishme
e historisë së Kishës Shenjte të Krishtit, pohoi kardinali Sodano gjatë homelisë së
Meshës, akt i fundit publik, para hyrjes së kardinajve në Konklav. Falënderoj mbi
të gjitha Zotin për papninë e ndritshme, që i dhuroi me jetë e vepra, të dashurit
e të nderuarit, Benedikti XVI të cilit, pohoi, në këtë çast, i shprehim edhe një herë
gjithë mirënjohjen tonë.
“Një Kishë “e pjekur”, që nuk lëkundet nga dallgët
e ideologjive relativiste, e themeluar fuqimisht në Krishtin “masë e humanzimit të
vërtetë”. Një Kishë me ”fe të qartë”, e lirë, e gjallëruar nga “shqetësimi i shenjtë”
për ta çuar fenë nëpër botë, për ta dëshmuar dashurinë në vërtetësi. Një Kishë, së
fundi, e aftë të mbjellë fryte që janë të paracaktuara për amshimin, ku toka dhe mjerimet
e saj shndërrohen në ‘kopshtin e Zotit’, falë udhëheqjes së një pape bari”. Rikujtime
shpirtërore e teologjike të të vërtetave bazale të krishterimit, por edhe figura simbolike
e urime, përbëjnë përmbajtjen dhe tonet autoritare të Kremtimit solemn, akti publik
paraprijës i Konklavit, që filloi....
Bazilika sot ishte e mbushur sa më nuk
zinte. Binte në sy harmonia e ngjyrave plot larmi, nga Elteri i Katedrës, që lartohet
mbi varrin e Shën Pjetrit, drejt fundit të Bazilikës: e kuqja e ndezur e veshjes së
kardinajve kombinohej me ngjyrën vjollcë të veshjeve të ipeshkvijve e me të bardhën
e veshjeve të meshtarëve, për të vijuar me ngjyrat e errëta të veshjeve të mijëra
besimtarëve, turma e të cilëve arrinte deri në fund të Katedrales së Popujve. Në këtë
atmosferë, udhëheqësit më të lartë të Kishës, pas ditëve të emocioneve të forta të
dorëheqjes së Papës Benedikti XVI, nisën rrugën që shikon drejt së ardhmes. Ishte
një kremtmim, ku u ndje fuqimisht thirrja e përsëritur drejtuar Shpirtit Shenjt për
dhuratën e bariut të ri: “Një pape – lexoi kremtuesi duke i lartuar Zotit lutjen –
që të pranohet nga ti, o Hy, për shenjtërinë e jetës, për përkushtimin e plotë në
shërbim të popullit tënd”.
Para fillimit të Meshës – në të cilën merrnin pjesë
edhe personalitete institucionale e politike italiane, të pranishmit, së bashku me
qindra-mijëra teleshikues nga mbarë bota, ndoqën procesionin e kardinajve: një skenë
e ngjashme me atë që u përsërit sot pasdite, kur të 115 kardinajtë zgjedhës u nisën
rishtas me procesion për t’u mbyllur në ritin e Konklavit. Por para këtij akti vendimtar,
kardinali Sodano tërhoqi vëmendjen e sivëllezëve të Kolegjit, gjatë homelisë, duke
i ftuar që, në këtë orë me përgjegjësi të madhe, të dëgjojnë me përqendrim të thellë,
atë që thotë Zoti, duke folur me fjalët e veta.
“Zoti na dhuroftë një Papë,
që e kryen me zemër bujare misionin fisnik të kryesimit në dashuri”. Me këto fjalë
Kardinali Dekan, Anxhelo Sodano, e përfundoi homelinë e Meshës “Pro eligendo Pontefice”,
të cilën e kryesoi, si Dekan i Kolegjit Kardinalor. Mesha e u kremtua nga të gjithë
kardinajtë, e jo vetëm nga zgjedhësit, të cilët sot pasdite hynë në Konklav. U
pritën me shumë interes, fjalët e Dekanit, i cili në këto ditë kryesoi punimet e Kongregacioneve
të përgjithshme. Identikiti, që del nga homelia e tij, është ai i një Pape bari
i vërtetë, i impenjuar në misionin e mëshirëse në kumtimin e Krishtit:“faktor i parë e themelor i zhvillimit të popujve”. Kardinali Sodano citoi
profecinë e Izaisë, që u dëgjua në Leximin e parë e që kumton se Zoti do të dërgojë
një Mesi, “përplot me mëshirë”, për t’u sjellë “lajmin e gëzuar të varfërve;
për t’u mjekuar plagët zemrave të thyera, për t’u shpallur lirinë skllevërve, për
t’i liruar të burgosurit”. Ky Mesi është Jezusi, përplot me dashuri, që duket
në mënyrë të veçantë kur takohet me vuajtjen, padrejtësinë, varfërinë, me të gjitha
ligështitë, si fizike, ashtu edhe morale. Këtë mision mëshire, shtoi Kardinali
Dekan, Krishti ua besoi barinjve të Kishës së Tij, e, posaçërisht, Ipeshkvit të Romës.
Kardinali Sodano, duke cituar mesazhin e Kreshmëve të Benediktit XVI, shpjegoi
se nganjëherë termi “dashuri e krishterë”, ngatërrohet me “solidaritetin” ose shikohet
thjesht si ndihmë humanitare. Ndërsa duhet theksuar se vepra më e lartë
e dashurisë së krishterë, është pikërisht ungjillëzimi. Duke kujtuar, pastaj,
fjalët e Populorum progessio të Palit VI, kardinali theksoi: “Është kumtimi i Krishtit,
faktori i parë e kryesor i zhvillimit”. Dekani foli, më pas, për shërbimin e unitetit,
që kryen Papa, me të cilin, pohoi “të gjithë ne duhet të bashkëpunojmë”. Sjellja
kryesore, që e dallon bariun, vijoi, është të japë jetën për delet e veta, e sa më
“e lartë e universale është detyra baritore, aq më e madhe duhet të jetë edhe dashuria
e krishterë e bariut”. Në kryerjen e këtij shërbimi të dashurisë për Kishën e
mbarë njerëzimin, Papët e fundit ishin mjeshtra të nismave të shumta bamirëse, në
dobi të popujve e edhe të bashkësisë ndërkombëtare, duke mbrojtur papushim, drejtësinë
e paqen. Të lutemi, që Papa i ardhshëm ta vijojë këtë veprimtari të vazhdueshme
në nivel botëror”. Ftesë kjo, e Kardinalit Dekan, drejtuar Selisë së Shenjtë,
për ta ngritur gjithnjë m lart zërin në nivel ndërkombëtar. T’i lutemi, përfundoi
“Zotit, të na dhurojë një Papë, që ta kryejë me zemër bujare misionin për të kryesuar
në dashuri”. Kujtojmë se në fillim të homelisë, kur kardinali Sodano falënderoi
Papën e dashur, Benediktin XVI, për papninë e tij, turma e besimtarëve shpërtheu në
duatrokitje të stuhishme.