Sinodi i Jeruzalemit në Veprat e Apostujve (Vp 15, 13-18): Fjalën e mori Jakobi e
tha: “Më dëgjoni, vëllezër! Simoni shpjegoi se si Hyji, që në fillim, u kujdesua të
përftojë prej paganëve një popull për Emër të vet. Kjo gjë është në përkim me fjalët
e profetëve, sikurse është shkruar: ‘Pastaj do të kthehem dhe do ta rindërtoj tendën
e rrëzuar të Davidit, do t’i rëndërtoj rrënojat e saj, përsëri do ta ngre që edhe
njerëzit të tjerë ta kërkojnë Zotin dhe mbarë paganët, mbi të cilët u thirr Emri im,
thotë Zoti që i bën këto të njihen që prej amshimit”. Në Ungjillin sipas Lukës
tregohet: “Unë jam ndër ju porsi ai, që shërben” (Lk 22, 27): kjo na bën të kuptojmë
domethënien biblike të zgjedhjes së Papës nga ana e Kolegjit Kardinalor. Kisha nuk
mund të jetë në Krishtin pa Pjetrin, shkëmbin mbi të cilin është ndërtuar e kreun
e saj, por edhe Pjetri nuk është udhëheqës i vetmuar në majë të ndonjë piramide; ai
është “i pari”, është kreu i të Njëmbëdhjetëve dhe “të atyre, që ishin me ta” (Lk
24,33); ai është qendra e atij “bashkimi” njerëzish, që organikisht orientohet ekskluzivisht
drejt ndjekjes së një të vetmit “Krye-Bari” (1Pjt 5,4), bariut të të gjithë barinjve
të popullit të Zotit. Ai është “sakramenti i dukshëm” i këtij Krye-Bariu në çdo çast
të historisë, pra i përket kohës. Prandaj, Pjetri e sheh gjithnjë vetveten me “të
tjerët” dhe të tjerët rreth Pjetrit.