Kardinajtë hyjnë në Konklavë, fillon zgjedhja e Papës së ri
Sot pasdite, në përkim me normat e Kushtetutës Apostolike Universi Dominici Gregis,
pas Meshës ‘për zgjedhjen e Papës’, kardinajtë hynë, me procesion, në Konklav, për
të zgjedhur Kryebariun e Kishës Katolike. U nisën nga Shtëpia e Shën Martës, në Vatikan,
për të hyrë në Kapelën Paoline të Pallatit Apostolik, ku u radhitën, për të nisur
procesionin. Kur radha e kardinajve dhe e patrikëve, veshur me rroba të kuqe e korale,
ishte gati, kardinali Dekan dha shenjën e fillimit të hyrjes në Konklav, duke bërë
Kryq. Kremtuesi shqiptoi fjalët simbolike: “Zoti, që u prin zemrave tona në udhët
e dashurisë e të durimit të Krishtit, qoftë me ju të gjithë” Pastaj kardinali Sodano,
që kryesoi kremtimin, duke iu drejtuar të pranishmëve, tha: “Të nderuar vëllezër,
pasi kremtuam misteret hyjnore, tani po hyjmë në Konklav për të zgjedhur Papën e Romës.
Mbarë Kisha, e bashkuar me ne në lutje, lyp pa pushim hirin e Shpirtit Shenjt, që
nga gjiri ynë të zgjidhet një bari i denjë për mbarë grigjën e Krishtit. Zoti i drejtoftë
hapat tanë në udhën e së vërtetës, që me ndërmjetësimin e së Lumes Mari, gjithmonë
Virgjër, të Shenjtorëve Apostuj Pjetër e Pal e të gjithë Shenjtorëve, të bëjmë përherë
atë, që i pëlqen Atij të lumit”. Pas këtyre fjalëve, nisi procesioni, në krye të
të cilit ishte ministranti me Kryqin e, pas tij, këngëtarët e Kapelës Sikstine, që
nisën të intonojnë himne të shenjta, më pas, ceremonierët, sekretari i Kolegjit të
Kardinajve dhe sekretari i Konklavit, kardinali Grech, që mbajti meditimin e pastaj,
të gjithë kardinajtë zgjedhës, sipas rendit: Diakonët, Presbiterët dhe Ipeshkvijtë.
Procesionin e mbylli kardinali Re, më i vjetri i Urdhërit të Ipeshkvijve, kremtues
i procesionit dhe i betimit në Kapelën Sikstine. Kardinali Re shoqërohej nga Mjeshtri
i Kremtimeve Papnore, imzot Marini. Procesioni eci ngadalë drejt Kapelës Sikstine,
ndërsa këngëtarët dhe asambleja këndonin, duke i shndërruar zërat, Litanitë e Mëdha,
në të cilat u kujtuan Shenjtorët e Lindjes e të Perëndimit. Lutja drejtuar Krishtit,
pas Litanive, si dhe lutjet për nevojat e ndryshme, kryesisht për ta lartuar njerëzimin,
për ta mbushur me etjen për qiellin, për ta shpëtuar nga vdekja e amshuar, nga uria,
nga lufta e nga të gjitha kobet, që të mund të gëzojë drejtësinë e paqen. E lutja
për ta shndritur Kishën Shenjte, duke i dërguar punëtorë të rinj për të korrat, duke
i mbrojtur ipeshkvijtë e të gjithë shërbëtorët e Ungjillit e duke u dhënë gjithë të
krishterëve, unitetin e fesë.
Si arritën në Kapelën Sikstine, kardinajtë
zunë vendet e caktuara. Ungjilli ishte vendosur në një vend të lartë e të denjë, për
të kryesuar kremtimin. Pas përfundimit të këngëve e Litanive, shoqëruar me lutje,
kardinali Dekan, në këmbë para elterit, intonoi himnin “Veni Creator Spiritus”-
“Eja, o Shpirt Krijues”, lutje solemne drejtuar Shpirtit Shenjt. Si përfundoi
kënga, kardinali Dekan, që kryesonte kremtimin, u drejtoi të gjithëve ftesën për t’u
lutur. Pasoi lutja në heshtje, hyrja në Konklav e betimi. Kardinali Dekan shqiptoi
me zë të lartë betimin: “Ne të gjithë e secili nga ne, kardinajtë, të pranishëm
në këtë zgjedhje të Papës, premtojmë, zotohemi e betohemi se do t’i respektojmë të
gjitha rregullat, që përmban Kushtetuta Apostolike e Papës Gjon Pali II, Universi
Dominici Gregis, shpallur më 22 shkurt 1996. Premtojmë, zotohemi e betohemi edhe
se kushdo prej nesh që, me hirin hyjnor, do të zgjidhet Papë i Romës, do të impenjohet
për ta kryer besnikërisht misionin e Pasardhësit të Shën Pjetrit, të Bariut të Kishës
Universale e për t’i mbrojtur me guxim të drejtat shpirtërore e tokësore, si dhe
lirinë e Selisë së Shenjtë. Mbi të gjitha, premtojmë e betohemi të respektojmë
me besnikëri të plotë e së bashku me të gjithë, si klerikët, ashtu edhe laikët, sekretin
e gjithçka ka të bëjë me zgjedhjen e Papës e edhe të gjithçka ndodh në vendin e zgjedhjes
e lidhet drejtpërdrejt ose tërthorazi, me votimin; se nuk do ta shkelim në asnjë mënyrë
këtë sekret, si gjatë, ashtu edhe pas zgjedhjes së Papës së ri, duke përjashtuar vetëm
rastin kur këtë e lejon vetë Papa; se nuk do të lejojmë asnjë mbështetje, favor, pengesë,
kundërshtim apo ndonjë formë tjetër të ndërhyrjes, me të cilën autoritetet shekullare
të çfarëdo urdhëri e grade, ose çfarëdolloj grupi njerëzish a individësh, do të dëshironin
të ndikonin në zgjedhjen e Papës së Romës”. Pastaj kardinajtë, me radhë, pohuan:
“Premtoj e betohem!”, duke vënë dorën mbi Ungjill e duke shqiptuar fjalët: “Kështu
më ndihmoftë Zoti e ky Ungjill, që po e prek me dorën time!”. U dëgjua, pastaj,
thirrja “Extra Omnes!”- “Jashtë të gjithë”, pas së cilës ata që nuk merrnin pjesë
në Konklav, u larguan nga Kapela Sikstine. Porta u mbyll edhe për ne, në një
Sallë ku lejohet të hyjë vetëm Zoti, që kryeson votimet, e kardinajtë e zgjedhur
prej Tij. Votimi nisi sipas nenit 54 të Kushtetutës Apostolike. Dita e parë:
besimtarët e mbledhur në Sheshin e Shën Pjetrit, me sytë ngulur tek oxhaku, në orën
19.00 panë të dilte tym i zi! Nesër do të jenë përsëri aty, në pritje të tymit të
bardhë, që shënon zgjedhjen e Papës së ri.