Եգիպտական Մէկէ Աւելի Քաղաքներու Մէջ Բռնարարքներ. «Պատրաստ Եմ Հրաժարելու, Եթէ Ատիկա
Եգիպտոսի Տագնապը Կը Լուծէ» Կ՛ըսէ Եգիպտոսի Ներքին Գործոց Նախարարը:
Շաբաթ օրուայ Գահիրէի եւ Փոր Սայիտի բռնարարքներուն պատճառով երկու զոհեր եւ տասնեակներով
վիրաւորներ արձանագրուած էին: Բռնարարքներու նոր ալիքը ընթացք առաւ, երբ «Փոր Սայիտի
մարզադաշտի ջարդ»-ին հարցով 21 ամբաստանեալներ կախաղան բարձրանալու, 5 ամբաստանեալներ
ցկեանս բանտարկութեան, իսկ 6 ուրիշներ 15 տարուան բանտարկութեան վճիռ ստացան: Գահիրէի
մէջ ֆութպոլի Ահլի խումբի համակիրները Ժազիրա շրջանին մէջ գտնուող ոստիկանութեան ակումբն
ու Եգիպտոսի ֆութպոլի ֆետերասիոնի կեդրոնատեղին հրկիզեցին: Փոր Սայիտի մէջ անոնք ապահովութեան
տնօրէնութեան եւ նահանգապետարանի շէնքեր ուղղուեցան` բողոքելու համար դատարանին արձակած
վճիռին դէմ: Եգիպտոսի ներքին գործոց նախարար Մոհամետ Իպրահիմ մամլոյ ասուլիսի մը ընթացքին
պահանջեց ոստիկանութիւնը ներքին քաղաքական տարակարծութեանց մէջ չներքաշել` աւելցնելով,
որ զինեալ ուժերը չեն կրնար երկրին մէջ ապահովութեան պահպանման դերը կատարել` նշելով,
որ ոստիկաններուն բարոյականը լրատուական իրերայաջորդ յարձակումներուն պատճառով անկում
արձանագրած է: Նշենք, որ Եգիպտոսի տարբեր շրջաններուն մէջ ոստիկաններ գործադուլ կատարեցին`
պահանջելով դատական անձեռնմխելիութիւն ունենալ, ցուցարարներու հետ բախումներու ընթացքին
աւելի ազդու զէնքեր ունենալ: Ներքին գործոց նախարարը խոստացաւ ջանալ անոնց հարցերը լուծել:
Ան յայտնեց, որ «յեղափոխութենէն ի վեր ոչ իսկ փամփուշտ մը արձակուեցաւ»` հերքելով այն
լուրերը, թէ ոստիկանութիւնը ցուցարարներուն վրայ կրակ կը բանայ: