Хрысціянскія Цэрквы жадаюць удзельнічаць у будучыні Еўропы
Прадстаўнікі Цэркваў
сустрэліся з ірландскім прэм’ер-міністрам Энда Кені. Ірландыя старшынюе зараз у Еўрапейскім
саюзе. У размовах, якія адбыліся напярэдадні ў Дубліне, прынялі ўдзел прадстаўнікі
Ірландскай Рады Цэркваў (ICC), Канферэнцыі Еўрапейскіх Цэркваў (KEK) і Камісіі Епіскапатаў
Еўрапейскай Супольнасці (COMECE). Хрысціяне розных канфесій паставілі пад сумнеў сэнс
абмеркавання эканоміі бюджэтных сродкаў без уліку іх сацыяльнага аспекту. У стараннях
пра эканамічны рост неабходныя – на думку хрысціянскіх лідэраў – намаганні, накіраваныя
на ліквідацыю структурнай беднасці і няроўнасці.
Прадстаўнікі Цэркваў звярнулі
ўвагу на “сацыяльныя наступствы цяжкага эканамічнага крызісу ў Еўрапейскім саюзе”,
які можна назіраць на ўзроўні парафій усіх Цэркваў, што з’яўляецца прадметам іх заклапочанасці
на мясцовым, рэгіянальным і нацыянальным узроўнях. Цэрквы ў Ірландыі асабліва занепакоены
наступствамі скарачэння выдаткаў на цяперашнія і будучыя пакаленні і на найбольш уразлівых
членаў грамадства.
Прызнаючы, што занятасць і стварэнне працоўных месц у Еўропе
з’яўляюцца адным з асноўных патрабаванняў для пераадолення крызісу, Цэрквы звярнулі
ўвагу на рост колькасці “працуючых бедных”. Яны заклікалі, каб падчас перагляду заканадаўства
аб працоўным часе, уключыць у яго пытанне агульнага для ўсіх выхаднога дня, які назвалі
“ясным і бачным знакам прымірэння асабістага, сямейнага і прафесійнага жыцця”.
Дэлегацыя
падкрэсліла неабходнасць працягу замежнай “дапамогі ў мэтах развіцця”. Хрысціянскія
лідэры заўважылі ў той жа час, што ўлады краін, якія развіваюцца, павінны збіраць
належную ім суму падаткаў ад працуючых на іх тэрыторыі міжнародных фірм.
Сустрэча
адбылася ў рамках рэгулярнага дыялогу паміж Цэрквамі і ЕС, прапісанага ў артыкуле
17 Лісабонскай дамовы.