Падрабязнасці канклаву: галасаванне ў дзве сесіі па два туры
Кс. Фэдэрыка Ламбардзі
расказаў аб падрабязнасцях, звязаныя з правядзеннем галасавання на канклаве. Яно будзе
адбывацца штодзённа двойчы – днём і вечарам. Прычым, і падчас дзённай, і падчас вячэрняй
сесій будзе праходзіць па два туры галасавання. Спаленне выбарчых картак прадугледжана
пасля кожнай сесіі, г.зн. пасля двух тураў галасавання, і будзе адбывацца ў 12.00
і 19.00 кожнага дня. Аднак, у выпадку абрання Папы падчас першага з галасаванняў,
спаленне адбудзецца раней – з 10.30 да 11.00 днём або з 17.30 да 18.00 вечарам. Падчас
сустрэчы з журналістамі 9 сакавіка кіраўнік Залы Друку расказаў аб парадку падрыхтоўкі
да канклава. Ён паведаміў, што за дзень да яго пачатку, 11 сакавіка ў 17.30 у капліцы
св. Паўла, што знаходзіцца ў Апостальскім палацы, адбудзецца прынясенне прысягі персаналам,
які будзе дапамагаць кардыналам у перыяд падрыхтоўкі да канклава. Ватыканскі тэлевізійны
цэнтр будзе праводзіць прамую трансляцыю з гэтай падзеі. Таксама 11 сакавіка, у першай
палове дня, адбудзецца чарговая агульная кангрэгацыя.
12 сакавіка каля 7.00
кардыналы-выбаршчыкі заселяцца у свае пакоі ў Доме св. Марты. Затым, у 10.00 у базыліцы
св. Пятра пачнецца св. Імша “Pro eligendo Pontifice” (Аб абранні Пантыфіка), якую
ўзначаліць дэкан Калегіі кардыналаў Анджэла Садана. Прадугледжана, што ў 15.45 адбудзецца
пераезд кардыналаў-выбаршчыкаў з Дома св. Марты ў ватыканскі Апостальскі палац. Затым,
у 16.30, спяваючы літанію да ўсіх святых, пурпураты ўрачыстай працэсіяй пяройдуць
з капліцы св. Паўла ў Сікстынскую капэлу. Тут пасля малітвы “Veni Creator Spiritus”
яны прынясуць прысягу і пачуюць духоўнае разважанне. Затым адбудзецца першае галасаванне.
Прадугледжана, што ў 19.15 пурпураты памоляцца Літургіяй гадзін у Сікстынскай капэле,
а затым вярнуцца ў Дом св. Марты.
Звяртаючыся да падзей агульнай кангрэгацыі
8 сакавіка, езуіт прызнаўся, што большасць кардыналаў пагадзілася з першай з прапанаваных
дат пачатку канклаву – 12 сакавіка. Таму галасаванне прайшло хутка і паведамленне
аб яго выніках з’явілася раней прадугледжанага тэрміну.