Італьянская газета аб тонкім пачуцці гумару кс. Ламбардзі
Цярплівасць, дакладнасць
і спакой. На гэтыя рысы кіраўніка Залы Друку Апостальскай Сталіцы кс. Фэдэрыка Ламбардзі
звяртае ўвагу італьянскае выданне “Corriere della sera”. Падчас штодзённых сустрэч
з журналістамі святар вымушаны адказваць на сотні пытанняў самага рознага кшталту:
ад сур’ёзных і важных, да павярхоўных і правакацыйных. Нягледзячы на гэта, кіраўнік
Залы Друку заўсёды кажа аб тым, што цікавіць супрацоўнікаў СМІ, аб чым ведае і мае
права казаць. На старонках італьянскага выдання адзначаецца, што калі справа тычыцца
асабліва “экстравагантных” пытанняў, кс. Ламбардзі адказвае на іх з пачуццём гумару.
У пацвярджэнне гэтаму прыводзіцца некалькі жартаўлівых адказаў кіраўніка Залы Друку.
Напрыклад, на пытанне, ці будзе кс. Ламбардзі прысутнічаць на канклаве, кіраўнік Залы
Друку адказаў: “Толькі кардыналы могуць прымаць удзел у ім, таму што ён праходзіць
у атмасферы поўнай сакрэтнасці. Справа не ў тым, што я не ўмею захоўваць сакрэты,
але проста не існуе прычын для таго, каб я быў там”. На прытанне аб тым, што дакладна
будзе рабіць Бэнэдыкт XVI 28 лютага ў 20.00, калі сыдзе ў адстаўку, кс. Ламбардзі
адказаў: “Што я магу сказаць, я думаю ён адправіцца павячэраць”.
Адзначаецца,
што часам пытанні, якія цікавяць журналістаў тычацца спраў, аб якіх кіраўнік Залы
Друку расказваць не мае права. Тады кс. Ламбардзі дакладна і тактоўна тлумачыць, што
даў прысягу аб захаванні ў сакрэце дэтальнай інфармацыі, звязанай з дыскусіямі кардыналаў,
і не можа падзяліцца ёй.