2012ին Տպագրուած Է 1922 Գիրք

Հայաստանի մշակոյթի նախարար Յասմիկ Պօղոսեանը հայատառ գրատպութեան 500ամեակի հանդիսութիւններուն եւ նախաձեռնութիւններուն նախապատրաստող պետական-յոբելեանական յանձնաժողովի նիստին ընթացքին ամփոփած է 2012ին, տպագրութեան 500ամեակի առնչուած նախաձեռնութիւնները։ Նախարարը յայտնած է, որ 2012ին տպագրուած է 1922 գիրք՝ մինչ այդ թիւը 1851 էր 2011ին. միայն պետական պատուէրով հրատարակուած է 172 գիրք:
Ըստ նախարարին, կարեւոր էր հայ գրաւոր ժառանգութեան բազմակողմանի ներկայացումը աշխարհի թանգարաններուն եւ գրադարաններուն մէջ՝ ցուցահանդէսներ կազմակերպելով աշխարհի հայատառ տպագրութեան կեդրոններուն մէջ՝ Վենետիկի, Ամսթերտամի, Վիեննայի, Փարիզի, Պուքրէշի, Լոնտոնի, Ս. Փեթերսպուրկի, Սոֆիայի, Թիֆլիսի, Երեւանի եւ Շուշիի մէջ:
«Բացառիկ էր Վենետիկի «Կորեր» եւ Հնագիտութեան թանգարաններում ու «Մարչանա» ազգային գրադարանում բացուած ցուցահանդէսը, որտեղ ներկայացուած 200 ցուցանմուշները բերուած էին Հայաստանից, Ֆրանսիայից եւ Իտալիայի ամբողջ տարածքից: Հայաստանը մասնակցել է գրքի միջազգային 14 տօնավաճառների՝ Ժնեւի, Բուենոս-Այրեսի, Լոս- Անջելեսի, Մինսկի, Փարիզի, Բոլոնիայի, Սալոնիկի, Սանկտ–Պետերբուրգի, Վարշաւայի, Թեհրանի, Աշխաբադի, Մոսկուայի, Ֆրանկֆուրտի, որոնցից չորսին՝ յատուկ կարգավիճակով», յայտնած է նախարարը՝ աւելցնելով, որ 2012 թուականը շատ արդիւնաւէտ էր նաեւ միջազգային համագործակցութեան տեսակէտէն. «Հայաստանեան կառոյցներն անդամակցեցին այնպիսի հեղինակաւոր կազմակերպութիւնների, ինչպիսիք են Հրատարակիչների միջազգային ասոցիացիան, Մանկապատանեկան գրքի միջազգային կոմիտէն, Երաժշտական գրադարանների միջազգային ասոցիացիան»:
Նախարարը կարեւորութեամբ անդրադարձած է «Սասնայ ծռեր» կամ «Սասունցի Դաւիթ» դիւցազնավէպերուն ԵՈՒՆԵՍՔՕի մարդկութեան ոչ նիւթական մշակութային ժառանգութեան ներկայացուցչական ցանկին մէջ ներառման։