Пурпураты чакаюць прыбыцця апошніх двух кардыналаў-выбаршчыкаў
У працы агульнай кангрэгацыі
прынялі ўдзел 153 кардыналы, сярод якіх было 113 кардыналаў-выбаршчыкаў. Аб гэтым
6 сакавіка расказаў кс. Фэдэрыка Ламбардзі, кіраўнік Залы Друку Апостальскай Сталіцы
падчас сустрэчы з журналістамі. Паводле яго, чакаецца прыезд апошніх двух кардыналаў
выбаршчыкаў – арцыбіскупа Варшавы кардынала Казімежа Ныча і в’етнамскага кардынала
Жана Баптыста Пан Мін Мана. Яны, паводле кс. Ламбардзі павінны прыбыць у Рым 6 і 7
сакавіка. Езуіт расказаў, што каб надаць агульнай кангрэгацыі атмасферу большага сяброўства
і блізасці, пурпураты павіншавалі з днём нараджэння кардынала Вальтэра Каспера, якому
5 сакавіка споўнілася 80 гадоў, кардынала Франчэска Кокапальмерыа, якому 6 сакавіка
споўнілася 77 гадоў, а таксама кардынала Хуліа Тэразаса, які 7 сакавіка будзе адзначаць
сваё 77-годдзе.
Кс. Ламбардзі таксама распавёў, што 6 сакавіка члены Калегіі
Кардыналаў выслухалі 18 дакладаў пурпуратаў з розных краін свету. Кіраўнік Залы Друку
падкрэсліў, што з датай пачатку канклава кардыналы да гэтага часу не вызначыліся.
Паводле яго, пурпураты жадаюць неспяшаючыся падрыхтавацца да гэтай падзеі. Таксама
журналістам быў прадэманстраваны кароткі відэазапіс з Сікстынскай капэлы, у якой адбываецца
падрыхтоўка да канклаву.
Адказваючы на пытанне журналістаў аб рэакцыі Апостальскай
Сталіцы ў сувязі са смерцю Прэзідэнта Венесуэлы Уга Чавеса, кс. Ламбардзі расказаў,
што арцыбіскуп Каракаса кардынал Хорхе Уроса, прысутны на агульнай кангрэгацыі ўжо
выказаў свае спачуванні.