Ապունա Մատաթիա ընտրուեցաւ Եթովպիայի Ուղղափառ Եկեղեցւոյ Պատրիարք։

Երուսաղէմի Եթովպիայի Ուղղափառ Եկեղեցւոյ առաջնորդը գերապայծառ Մատաթիա ընտրուեցաւ որպէս վեցերորդ պատրիարքը Եթովպիայի Ուղղափառ Եկեղեցւոյ, առնելով Մատաթիա Ա-ին անունը։ Ան ընտրուեցաւ 28 փետրուար Եթովպիայի Ուղղափառ Եկեղեցւոյ ընդհանուր սիւնոդոսէն, որուն մասն կը կազմեն 806 եկեղեցականներ ու աշխարհականներ։ Անոր գահակալութիւնը տեղի ունեցաւ 3 մարտ Ատիս Ապեպայի Ս. Երրորդութեան աթոռանիստ եկեղեցւոյ մէջ։ Եթովպիայի Ուղղափառ Եկեղեցւոյ Պատրիարքի գահակալութեան արարողութեան որպէս Ամենայն Հայոց Կաթողիկոսի ներկայացուցիչներ մասնակցեցան Իրաքի հայոց թեմի առաջնորդ Աւագ արքեպիսկոպոս Ասատուրեանը եւ Եգիպտոսի հայոց թեմի առաջնորդ Աշոտ եպիսկոպոս Մնացականեանը։
Նշենք որ Եթովպիայի Ուղղափառ Եկեղեցին 17 օգոստոս 1948-ին բաժնուեցաւ Եգիպտոսի Ղպտի ուղղափառ եկեղեցիէն դառնալով ինքնագլուխ եկեղեցի մը։ Եթովպիայի Ուղղափառ Եկեղեցին ունի աւելի քան 50 միլիոն հաւատացեալներ, ռուս ուղղափառ եկեղեցիէն ետք թիւով եկրորդ է։