Atë Lombardi: ajo e Benediktit XVI, një lamtumirë plot shpresë
Bashkësia kishtare vijon të lutet, në pritje të Konklavit, që do të zgjedhë Papën
e ri. Benedikti XVI, tashmë “shtegtar i thjeshtë”, ia besoi Kishën Kryebariut të saj,
Krishtit: Kisha është e tija, tha, e është Ai, që do të vijojë t’i prijë. Ndërkaq,
në zemrat e besimtarëve do të mbeten të paharrueshme emocionet e këtyre ditëve, kaq
të pazakonta. Të dëgjojmë editorialin e Atë Federiko Lombardit:
"Dy
ditët e fundit të Papnisë së Benediktit XI do të mbeten, pa asnjë dyshim, të skalitura
në kujtesën e miliona njerëzve e do të shënojnë një etapë të rëndësishme, të re, të
pashembullt, në historinë e Kishës, gjithnjë shtegtare. Për disa, ishte gati-gati
si zbulim i humanizmit dhe i përshpirtërisë së Papës, për të tjerët, vërtetim i jetës
së tij të përvujtë, e njëkohësisht, tepër të lartë në fe.
Në se Papa
Vojtila pati dhënë, me guxim të admirueshëm para syve të mbarë botës, dëshminë e tij
të fesë në sëmundje e në vuajtje, Papa Ratcinger, me të njëjtin guxim, dha, përpara
syve të Zotit, dëshminë e pranimi të kufizimeve të moshës së shtyrë dhe të gjykimit
mbi ushtrimin e përgjegjësisë së besuar nga Hyji. Që të dy na mësuam, jo vetëm me
magjsterin e tyre, por edhe, e ndoshta më shumë, me jetën e tyre, ç’do të thotë ta
kërkosh e ta gjesh çdo ditë vullnetin e Zotit për ne e për shërbimin tonë, edhe në
çastet më të vështira të jetës njerëzore.
Siç na e tha bindshëm ai vetë,
dorëheqja e Papës nuk është, në asnjë mënyrë, braktisje. Papa nuk heq dorë nga misioni
i besuar e, aq më pak, nga besimtarët. Vijon t’ia besojë Zotit Kishën e Tij, me shpresë
të sigurtë se edhe Ai do të vijojë t’i prijë. Me përvujtëri e qetësi të plotë, Benedikti
XVI pohoi se u përpoq të bëjë gjithçka ishte e mundur për t’i shërbyer sa më mirë
Kishës, një Kishe, që nuk është e tija, por e Zotit e, përmes veprës së vazhdueshme
të Shpirtit Shenjt, jeton, rritet e i rizgjon pambarimisht shpitrat njerëzore. Në këtë kuptim, trashëgimia e Papës Benedikti XVI është sot ftesë për lutje
e përgjegjësi, drejtuar të gjithëve. Sigurisht, në radhë të parë, kardinajve, të cilëve
u përket detyra e zgjedhjes së Pasardhësit, por natyrisht edhe mbarë Kishës, që duhet
ta shoqërojë me lutje, gjykimin e zgjedhësve e, pastaj, edhe Papën e ri, në misionin
e kumtimit të frytshëm të Ungjillit, për të mirën e Kishës e të mbarë njerëzimit,
duke i prirë bashkësisë me besinikëri gjithnjë më të madhe ndaj vetë Ungjillit të
Krishtit. Sepse këtë asnjë papë nuk mund ta bëjë i vetëm. Duhet ta bëjmë, prandaj,
edhe ne, së bashku me të, e “Papa i nderit Benedikti” do të vijojë të na shoqërojë
“duke punuar” për këtë - janë fjalët e tij të fundit publike: me zemër, me dashuri,
me lutje, me reflektim”. Faleminderit, Papa Benedikti!".