“Апошнія два дні пантыфікату
Бэнэдыкта XVI, вядома, захаваюцца ў памяці многіх людзей і пазначаць важны, новы і
беспрэцэдэнтны этап у гісторыі пілігрымуючага Касцёла“, - адзначыў кс. Фэдэрыка Ламбардзі
ў сваёй аўтарскай рубрыцы ў эфіры Ватыканскага радыё. Паводле кіраўніка Залы Друку
для многіх вернікаў чалавечнасць і духоўнасць Папы стала амаль адкрыццём, а для іншых
- пацьвярджэннем яго сціпласці і моцнага жыцця верай.
“Калі Ян Павел ІІ з мужнасцю
выявіў свету сведчанне веры ў пакутах хваробы, то Бэнэдыкт XVI не з меншай адвагай
засведчыў перад Богам абмежаванні старасці і немагчымасць адказнага выконваня абавязкаў,
якія Бог усклаў на яго”, - адзначыў дырэктар нашага радыё і дадаў, што абодва Пантыфікі
паказалі нам, не толькі сваім вучэннем, але магчыма нават яшчэ больш самім сваім жыццём
тое, што значыць штодзённа шукаць і знаходзіць Божую волю, нават у найбольш складаных
момантах чалавечага існавання. Італьянскі езуіт упэўнены ў тым, што Бэнэдыкт ХVI
з пакорай і спакоем намагаўся “рабіць усё магчымае” , каб добра служыць Касцёлу, які
не з’яўляецца яго, але Бога і які праз пастаяннае дзеянне Святога Духа “жыве, расце
і абуджаецца ў душах”.
Паводле кс. Ламбардзі ў гэтым сэнсе спадчына, якую
пакінуў нам Бэнэдыкт ХVI заклікае ўсіх да малітвы і адказнасці. “Перш за ўсё, за кардыналаў,
якія маюць сваім заданнем выбраць новага Наступніка св. Пятра, але таксама і за ўвесь
Касцёл, які павінен суправаджаць малітвай разважнасць выбаршчыкаў новага Папы для
эфектыўнага абвяшчэння Евангелля “на дабро Касцёла і чалавецтва”, - адзначыў прадстаўнік
Святога Пасаду і дадаў, што ніякі Пантыфік не можа рабіць гэтага сам. Ён сказаў, што
ўсе мы павінны дапамагаць у гэтым новаму Папе, а “Папа на пенсіі”, будзе суправаджаць
нас “сваім сэрцам, любоў’ю, малітвай і разважаннямі”.