Кардынал Таран: шчыры міжрэлігійны дыялог – шлях надзеі

Камісія па рэлігійных адносінах з мусульманамі пры Папскай радзе па міжрэлігійным дыялогу выбрала тэму для абмеркавання на працягу наступных чатырох гадоў: “Хрысціяне і мусульмане - маякі надзеі”. Гісторыя “гэта не проста нейкая рэч з мінулага, але тое, што ўплывае станоўча ці адмоўна на сучаснасць і будучыню”, сказаў на адкрыцці пасяджэнняў 28 лютага старшыня Папскай рады па міжрэлігійным дыялогу кардынал Жан-Луі Таран. Ён таксама прыпомніў гісторыю хрысціянска-мусульманскіх адносін з моманту нараджэння ісламу ў сёмым стагоддзі.На яго думку, прыспеў час працаваць разам хрысціянскім і мусульманскім гісторыкам. Толькі аб’ектыўны і дружалюбны падыход да фактаў з гісторыі “можа адкрыць шлях прасіць і атрымаць прабачэнне”.
На далейшых пасяджэннях Камісіі былі падкрэслены тры сферы, якія заслугоўваюць асаблівай увагі: не паддавацца спакусе перайсці ад міжрэлігійнага да палітычнага дыялогу; забеспячыць павагу рэлігійных каштоўнасцяў дзвюх рэлігій і паводзінаў іх паслядоўнікаў, з асаблівай увагай да чалавечай годнасці і правоў чалавека; мець магчымасць на атрыманне добрай адукацыі, каб гэта дазваляла весці сапраўдны разважлівы міжрэлігійны дыялог.
Камісія ўключае ў сябе восем каталіцкіх кансультараў хрысціянска-мусульманскага дыялогу з такіх краін, як Ірак, Нігерыя, Пакістан, Італія, Германія, Вялікабрытанія і Злучаныя Штаты Амерыкі. Бэнэдыкт ХVI прызначыў склад экспертаў 21 верасня 2012 г., а сама Камісія была заснавана Папам Паўлам VI у 1974 годзе.