Бэнэдыкт XVI адпачывае і шмат моліцца

28 лютага, у 20.00, з пачаткам перыяду “sede vacante” камерленга, якім з’яўляецца кардынал Тарчызіа Бэртонэ, запячатаў папскія апартаменты ў ватыканскім Апостальскім палацы. Аб гэтым расказаў журналістам кс. Фэдэрыка Ламбардзі падчас брыфінгу, які адбыўся 1 сакавіка ў Зале Друку Апостальскай Сталіцы. Журналістам было прапанавана таксама паглядзець чатыроххвілінны відэазапіс гэтай падзеі падрыхтаваны Ватыканскім тэлевізійным цэнтрам. Кіраўнік Залы Друку паведаміў, што 1 сакавіка віцэ-камерленга апячатаў апартаменты Папы ў Латэранскім палацы, а яшчэ 28 лютага, у 20.01, Дзяржсакратарат скіраваў пасланне да ўсіх папскіх прадстаўнікоў, каб абвясціць пачатак перыяду “sede vacante”. Езуіт расказаў, што паразмаўляў з арцыбіскупам Георгам Генсвайнам, асабістым сакратаром Бэнэдыкта XVI. Ён паведаміў, што Папа, паглядзеў вячэрнія навіны па тэлебачанні і быў рады прысутнасці вялікай колькасці вернікаў і пілігрымаў, якія сабраліся, каб развітацца з ім. Кс. Ламбардзі падзякаваў прадстаўнікам СМІ за добра зробленую працу.

Арцыбіскуп Генсвайн таксама падзяліўся з кіраўніком Залы Друку, што пасля вечары Бэнэдыкт XVI здзейсніў кароткую прагулку па дворыку Апостальскага палацу ў Кастэль Гандольфа. Раніцай 1 сакавіка ён цэлебраваў св. Імшу, а потым маліўся. Каля 16.00 Бэнэдыкт XVI запланаваў прагулку па садах летняй рэзідэнцыі, падчас якой памоліцца ружанцовай малітвай. Кс. Ламбардзі расказаў, што Папа ўзяў з сабой дыскі з любімай класічнай музыкай, а таксама некалькі кніг, сярод якіх праца тэолага Ганса Урса Бальтазара “Тэалагічная эстэтыка”. Акрамя таго, паводле апавядання арцыбіскупа Генсвайна, на працягу апошніх дзён Бэнэдыкт XVI некалькі разоў граў на фартэпіяна.