Պենետիկտոս ԺԶ-ի քահանայապետութեան յիշարժան կարեւոր թուականները:

(Ռատիօ Վատիկան) Որպէս Տիեզերական եկեղեցւոյ պետ,  Պենետիկտոս ԺԶ-ի առաքելութիւնը տեւեց 7 տարի, 10 ամիս եւ 9 օր,  որուն ընթացքին  Ան 24 առաքելական ճամբորդութիւններ կատարեց, երեք շրջաբերական թուղթեր հրատարակեց, 84 կարդինալներ նշանակեց եւ երանելի հռչակեց իր նախորդը՝  Սուրբ ՅՊԲ-ը։  Ան նաեւ դիմագրաւեց բազմաթիւ տագնապներ,  Ռաթիզպոնի  մէջ արտասանած ճառին  հետեւանքով ստեղծուած թիւրիմացութենէն սկսեալ, մինչեւ իր  անմիջական ամենամօտիկ սպասաւորին դաւաճանութիւնը։  Հարցերու շարքին նշենք նաեւ կարգ մը կղերականներու կողմէ կատարուած մանկապղծութիւնները։

Պենետկտոս ԺԶ  մեծ աշխատանք տարաւ համամիութենական եւ կրօնական երկխօսութեան գետնի վրայ.  ջանաց  ''երկխօսութիւն'' հաստատել lefebvristes-ներու ու  նաեւ` շեշտակի կերպով  հրեաներու հետ։ Ընդլայնեց  Վատիկանի  դիւանագիտական յարաբերութիւնները  արեւելեան երկիրներու հետ։

2005-ին՝ 19 ապրիլին, Վատիկանի մէջ կարդինալական դասը երկու օր տեւող ընտրական ժողովէն ետք,  ՅՊԲ.ի յաջորդը ընտրեց  78-ամեայ գերմանացի կարդինալ Ժոզէֆ Ռացինկերը՝ հաւատքի վարդապետութեան խորհուրդի նախագահը։  Ան դարձաւ կաթողիկէ եկեղեցւոյ  265-րդ Պապը, առնելով Պենետիկտոս ԺԶ. անունը։ Անոր գահակալութեան արարողութիւնը տեղի ունեցաւ 24 Ապրիլ 2005-ին, Ս Պետրոսի հրապարակին վրայ,  ներկայութեամբ եկեղեցական, քաղաքական բարձրաստիճան  անձնաւորութիւններու եւ   պատուիրակութիւններուն,  ինչպէս նաեւ հաւատացեալներու հոծ բազմութեան։

Ոչ իսկ մէկամսեայ քահանայապետ, ան սկիզբ տուաւ իր նախորդին՝  ՅՊԲ-ի  երանացման դատը, առանց սպասելու սովորական հինգ տարուայ պայմանաժամը, եւ  ապա 2011-ի մայիսին,  Ինք նախագահեց երանացման հանդիսաւոր արարողութիւնը, որուն մասնակցեցան  աւելի քան մէկ միլիոն հաւատացեալներ։

Նոյն տարին՝ օգոստոսին,  իր առաջին ճամբորդութիւնը կատարեց  գերմանիա։ Քոլոնիայի մէջ   նախագահեց  երիտասարդներու համաշխարհային օրը, որ նախաձեռնած էր իր նախորդը՝ ՅՊԲ քահանայապետը։

Պենետիկտոս ԺԶ Քահանայապետի քահանայապետութեան յիշարժան թուականներու շարքին նշենք.
19 Օգոստոս 2005 - Այցելութիւնը Քէօլնի  հրէական տաճարը։

2006-ի` 25 Յունուարին, ''Աստուած Սէր է'' առաջին  շրջաբերական թուղթը։

25-28 մայիս 2006-ին,  Լեհաստան կատարած ճամբորդութեան  ընթացքին ''Աուշվից- Պիրքէնաու'' Շոայի յիշատակի վայրի այցելութիւն։

8-9 Յուլիսին,  Վալէնսիա (Սպանիա)  ընտանիքի համաշխարհային Ե. հանդիպումին առթիւ։

9-14 Սեպտեմբեր, Պավիէրա` ապա այցելութիւն իր ծննդավայրին` Marktl-am-Inn գիւղը։

28  նոյեմբերէն  մինչեւ 1 դեկտեմբեր, առաքելական ճամբորդութիւն Թուրքիա։

2007-ին՝ 16 Ապրիլին,  լոյս կը տեսնէ  ''Նազովրեցի Յիսուս'' գիրքի Ա. հատորը

9-14  մայիս 2007, առաքելական ճամբորդութիւնը Պրազիլ.

30 Յունիս 2007-ին,  Չինացի կաթողիկէներուն  ուղղուած նամակին մէջ, Սրբազան Քահանայապետը  կոչ կ՝ուղղէ  Փէքինի իշխանութեանց ապահովելու համար ''կրօնական ճշմարիտ ազատութիւն''։

7 յուլիս 2007-ին, Պենետիկտոս  ԺԶ. յղեց «Motu Proprio Summorum Pontificum» առաքելական պատգամը, որուն մէջ  յորդոր կ՝ուղղէ  կատարելու՝ սուրբ Պատարագի հանդիսութիւնը, Սուրբ Պիոս Ե.-ի պատարագամատոյցին համաձայն։

15-21 Ապրիլ 2008, Պենետիկտոս ԺԶ  այցելեց Միացեալ Նահանգները ու Նիւ Եորքի մէջ, ՄԱԿ-ի ընդհանուր ժողովին  կարեւոր ճառ մը արտասանեց։

12-21 Յուլիս  2008 այցելեց Աւստրալիա, Սիտնիի  երիտասարդներու համաշխարհային օրուան առթիւ։

Նոյն տարին՝ Սեպտեմբերին (12-15 սեպտեմբեր) այցելեց ֆրանսա, կարեւոր ճառ արտասանեց մշակոյթի աշխարհի ներկայացուցիչներուն՝ Փարիզի  մէջ,  եւ Լուրտի մէջ նախագահեց՝ ֆրանսայի եպիսկոպոսաց  դասին մասնակցութեամբ, Տիրամօր երեւման 150-րդ տարեդարձին՝  նշման արարողութիւնը ։

2008-ի՝ 5-26 հոկտեմբեր, Վատիկանի մէջ  Պենետիկտոս ԺԶ գլխաւորեց ''Աստուծոյ խօսքը եկեղեցւոյ կեանքին ու առաքելութեան մէջ'' խորագրով եպիսկոպոսաց սիւնհոդոսը։

2009-ին, Պենետիկտոս ԺԶ,  աշխարհի բոլոր եպիսկոպոսներուն  յղեց եկեղեցական հաղորդութեան  պատգամը։ Նոյն տարին՝ 20 հոկտեմբերին,  ստեղծեց կանոնական կառոյցը,   կաթողիկէ Եկեղեցւոյ մէջ ընդունելու համար անկլիգան հաւատացեալները, որոնք կը մերժեն իրենց տեղական եկեղեցւոյ բարենորոգումները։ 

2010-ին, հովուական այցելութիւն կատարեց Քամերուն եւ Անկոլա (Ափրիկէ)  յանձնելով տեղւոյն եպիսկոպոսներուն, Ափրիկէի յատուկ սիւնհոդոսի ''թղթածրարը''։

8-15 մայիս 2010-ին,   առաքելական ճամբորդութիւն կատարեց Յորդանան եւ Իսրայէլ ինչպէս նաեւ  Պաղեստինեան հողամաս,  սատարելու  խաղաղութեան  ու քաջալերելու տեղւոյն  քրիստոնեաները։

Նոյն տարին հրատարակուեցաւ ''Caritas in Veritate - Սէրը ճշմարտութեան մէջ'' Սրբազան Հօր Գ-րդ  շրջաբերական թուղթը ։

2010-ի՝ 17-եւ 18 Ապրիլին,  երկօրեայ այցելութիւն  կատարեց Մալթա։

Մայիս  11-14,  այցելելով Փորթուկալ, Պենետիկտոս ԺԶ ֆաթիմայի Տիրամօր  յանձնեց  մարդկութեան ու եկեղեցւոյ ''յոյսերն ու տառապանքները''։

4-6 յունիս 2010-ին,  Կիպրոս այցելելով Միջին Արեւելքի  սիւնհոդոսի աշխատանքային թղթածրարը յանձնեց Արեւելեան եկեղեցիներուն։

24 յունիս 2010-ին, Պենետիկտոս  ԺԶ. ստեղծեց Նոր Աւետարանումի քահանայապետական խորհուրդը։Այս շրջագիծէն ներս  Սրբազան Քահանայապետը հռչակեց Հաւատքի Տարին (11 հոկտեմբեր 2012- 24 նոյեմբեր 2013), վերակենդանացնելու համար քրիստոնէական հաւատքը, օգտագործելով ժամանակակից արդիական միջոցները­, ի սպաս Աստուծոյ Խօսքի հռչակումին ի սփիւռս  աշխարհ ։

Նոյեմբեր 2010-ին, Պենետիկտոս ԺԶ.  կը հրատարակէ «Աշխարհին Լոյսը» խորագրով գիրքը։   

2011-ի՝  18-21 օգոստոս,  Պենետիկտոս ԺԶ  մասնակցեցաւ  Մատրիտի երիտասարդաց համաշխարհային 26-րդ օրուան հաւաքին՝ Մատրիտի մէջ (Սպանիա)։

27 հոկտեմբերին  Ասսիզիի մէջ մասնակցեցաւ տարբեր կրօնապետերու եւ ներկայացուցիչներու հետ հանդիպումին։

18-20 նոյեմբեր 2011-ին,  այցելեց Պէնան՝ Արեւմտեան Ափրիկէի աւետարանացման 150-րդ տարեդարձին առթիւ, եւ  հրատարակեց առաքելական յորդորագիր մը՝  երկու տարի առաջ Վատիկանի մէջ գումարուած Ափրիկէի յատուկ սիւնհոդոսի աշխատանքներու աւարտին։

2012-ին Վաթիլիքսի գայթակղութիւններու շրջանը...

18 փետրուար 2012-ին, Պենետիկտոս ԺԶ  անուանեց 24 նոր կարդինալ։

20 մարտի 2012-ին, Սրբազան Հօր  Իրլանտա  կատարած առաքելական  այցելութենէն ետք,  Ս Աթոռը մանկամոլութեան դէմ պայքար  յայտարարեց Իրլանտայի կղերական դասի կողմէ  մանուկներուն կիրարկուած բռնաբարումներուն ի տես, ։

23-28 Մարտ 2012-ին,  Պենետիկտոս ԺԶ  այցելեց Մեքսիքօ-ն . ուր ջերմ ընդունելութիւն գտաւ մեքսիքացի ժողովուրդի կողմէ. այցելեց նաեւ Քուպան ՝ուր հանդիպում ունեցաւ Քուպայի յեղափոխութեան հայր՝ ֆիտէլ Գասթրոյի հետ։

23 մայիսի 2012-ին,  Սրբազան Հօր անմիջական սպասաւորը՝ Փաուլօ Կապրիէլէն  կը ձերբակալուի  Վատիկանի ոստիկանութեան կողմէ, ապա  IOR-ի՝ Վատիկանի դրամատան տնօրէնը, իտալացի Էթթօրէ Կոթթի Թէտէսքին կը ստիպուի հրաժարիլ իր պաշտօնէն...  22 դեկտեմբերին  Սրբազան հայրը ներում կը շնորհէ իրենց սպասաւորին։

2012-ի  կարեւոր դէպքերէն կարելի է նշել Սրբազան Հօր 14 - 16 սեպտեմբեր կատարած  ճամբորդութիւնը Լիբանան, յանձնելու՝  Միջին Արեւելքի Եպիսկոպոսաց յատուկ Սիւնհոդոսի յորդորագիրը։ Այս առթիւ Նորին Սրբութիւնը այցելեց Զմմառու հայ կաթողիկէ պատրիարքութեան դարաւոր վանքը ու բացումը կատարեց Յակոբ Մեղապարտի ուրբաթագիրքի հեղինակին կիսանդրիին, հայ տպագրութեան 500 ամեակի առթիւ։ Պատմական աննախընթաց դէպք մը,  քանի որ Պենետիկտոս ԺԶ Ա քահանայապետն էր այցելեց հայ կաթողիկէ Զմմառու պատրիարքական վանքը...

7 - 28 Հոկտեմբեր 2012-ին,  Վատիկանի մէջ կը գումարուի  ''Նոր Աւետարանութեան'' մասին եպիսկոպոսաց սիւնհոդոսը։

21 նոյեմբեր 2012-ին, լոյս կը տեսնէ Սրբազան Քահանայապետին ''Յիսուս Նազովրեցի'' եռամաս գրքի երրորդ հատորը, որը ամբողջութեամբ կ՝անդրադառնայ  Յիսուս Քրիստոսի վարդապետութեան մասին։  

2013-ին   11 փետրուարին Պենետիկտոս ԺԶ նախագահելով Վատիկանի մէջ գումարուած կարդինալական դասի ընդհանուր ժողովը,  կը յայտնէ թէ  կը հրաժարի ''Պետրոսեան'' գահի պաշտօնէն։ Այնուհետեւ՝ 28 Փետրուարին ժամը 20-էն սկսեալ, Հռոմի աթոռը՝ Սուրբ Պետրոսի աթոռը, թափուր կը մնայ ։