2013-02-25 12:35:52

Պենետիկտոս ԺԶ Սրբազան Քահանայապետը Ունկնդրութիւն Շնորհեց
Հետաքննական Կարդինալական Յատուկ Յանձնախումբի Անդամներուն։


Երկուշաբթի 25 փետրուար 2013-ի առաւօտեան ժամը 11-ին,Պենետիկտոս ԺԶ Սրբազան Քահանայապետը իր գրասենեակի մէջ ընդունեց հետաքննութեան կարդինալական յատուկ յանձնախումբի անդամ կարդինալներ` Ժուլիան Հէրրանզ, Ժոզէֆ Թոմքօ եւ Սալվատորէ Տէ Ճորճի ու անոնց ընկերացող Հայր Լուիճի Մարթինիանին։
Սոյն հանդիպումով Սրբազան Քահանայապետը ուզեց շնորհակալութիւն յայտնել հետաքննական յանձնախումբին տարած աշխատանքին համար, հայող` ''վատիկանեան գաղտնի լուրերու տարածման'' հարցին։ Նորին Սրբութիւնը անոնց յանձնարարեց որ հետազօտական թղթածրարը փոխանցուի միայն յաջորդ նորընտիր Քահանայապետին։
Սրբազան Հայրը ապա ժամը 11,30ին ընդունեց Եպիսկոպոսներու Ժողովի կառավարիչ` Կարդինալ Մարք Ուելլէն։
Յայտնենք որ Պենետիկտոս ԺԶ-ը հինգշաբթի 28 փետրուարի առաւօտեան` իր քահանայապետութեան վերջին օրը, հրաժեշտի հանդիպում կ՛ունենայ կարդինալական դասի անդամներուն հետ մինչ չորեքշաբթի 27 փետրուարին Սուրբ Պետրոսի հրապարակի վրայ պիտի նախագահէ քահանայապետութեան վերջին հրապարակային ունկնդրութիւնը որուն կը նախատեսուի 250 հազար հաւատացեալներու մասնակցութիւնը։








All the contents on this site are copyrighted ©.