Dioqeza e Sapës fton besimtarët t’i lutën Hyjin për Papën
Shumë të nderuar vëllezër meshtarë, rregulltar dhe rregulltare, besimtarë
të dashur në Dioqezën e Sapës Dorëheqja e Papës Benediktit XVI u prit me befasi
të madhe. Por ky vendim i tij, pas një rrëmimi të ndërgjegjes dhe për të mirën e Kishës,
tregon kurajo të madhe që meriton respekt të veçantë dhe mirënjohje për një udhëheqje
të jashtëzakonshme të Kishës gjatë këtyre tetë vjetëve. Papa Benedikti XVI e shikon
me sinqeritet e realizëm gjendjen e Kishës në realitetin e sotëm bashkëkohor dhe na
ofron një dëshmi feje, besimi të patundur në Shpirtin Shenjtë Zot, që e udhëheq Kishën
e Krishtit.
Me 28 shkurt në ora 20.00 Papa Benedikti XVI largohet
nga Selia e Shën Pjetrit, ajo mbetet e zbrazët deri në zgjedhjen e Papës së ri nga
ana e Kardinajve.
Për këtë, në ditën e fundit të ushtrimit të shërbimit
papnor të Benediktit XVI ju ftoj të gjithëve: meshtar, rregulltar dhe rregulltare
së bashku me besimtarët e gjithë dioqezit dhe mua bariun tuaj,të bashkohemi
në lutje në këto momente me rëndësi të madhe për jetën e Kishës, për të shprehur
dashurinë e falënderimin tonë Atit të Shenjtë Benediktit XVI, si dhe për t’iu lutur
Zotit me të e për të dhe për t’ia besuar të ardhmen e të mirën e Kishës, Jezu Krishtit,
Bariut të amshuar.
Lutja mund të organizohet gjatë gjithë ditës së datës 28
shkurt 2013 duke qëndruar në adhurim nëpër kishat apo kapelat tona e në mënyrë të
veçantë duke kremtuar Meshën shenjte në njetin e sipërpërmendur. Me besim dhe shpresë
në Zotin ju falënderoj për lutjet tuaja dhe ju përshëndes të gjithëve në Krishtin
Bariun e Mirë Imzot Lucjan Avgustini