Спадчына Бэнэдыкта XVI – Касцёл належыць да Хрыста
Да заканчэння пантыфікату
Бэнэдыкта XVI застаецца 10 дзён. 28 лютага Папа правядзе свой апошні дзень у папскіх
пакоях Апостальскага палацу. Затым, пасля прабывання ў Кастэль-Гандольфа, ён паселіцца
ў кляштары на тэрыторыі Ватыкана, каб маліцца аб дабры Касцёла. “Для дабра Касцёла”
– так Папа патлумачыў сваё рашэнне пакінуць Пасад св. Пятра. Аб адданасці гэтаму ідэалу
ён шмат разоў сведчыў на працягу свайго пантыфіката і асабліва ў яго апошнія дні.
Дабро Касцёла для яго важнае перш за ўсё таму, што Касцёл належыць не нам і нават
не Наступніку св. Пятра. Касцёл – належыць да Хрыста. Аб гэтым Святы Айцец казаў падчас
агульнай адыенцыі 13 лютага 2013 г.“ Я зрабіў гэта ў поўнай свабодзе для дабра Касцёла,
пасля таго, як доўга маліўся і здзейсніў перад Богам рахунак сумлення (...) Мяне падтрымлівае
і асвятляе перакананне, што Касцёл належыць да Хрыста, які ніколі не дазволіць, каб
яму не хапала кіраўніцтва і клопату”, - казаў Папа.
Паводле Бэнэдыкта XVI,
калі Касцёл належыць да Хрысту, тады падзелы і эгаістычныя імкненні да дамінавання
з’яўляюцца проста непрымальнымі. На самым пачатку Вялікага посту, у Папяльцовую сераду,
ён сказаў, што неабходна пачынаць з адмаўлення ад зла. “Я асабліва думаю аб грахах
супраць адзінства Касцёла, падзелах цела Касцёла”, - сказаў ён і дадаў, што калі Вялікі
пост пройдзе ў “відавочным касцёльным адзінстве” – гэта будзе “пакорным і каштоўным
знакам, для тых, хто далёкі ад веры ці абыякавы да яе”.
Таксама ў апошнія дні
свайго пантыфікату Папа даў нам заданне на будучыню: слухаць Божае слова і дазволіць
Яго волі весці нас. “Касцёл, Маці і Настаўніца, кліча ўсіх сваіх членаў духоўна абнавіцца,
рашуча звярнуцца да Бога, адчужаючы пыху і эгаізм, для таго, каб жыць у любові. Гэты
Год веры, Вялікі пост – час асабліва спрыяльны для адкрыцця веры ў Бога, у якасці
базавага крытэрыя нашага жыцця і жыцця Касцёла”, - сказаў Святы Айцец. Паводле Бэнэдыкта
XVI, новая эра хрысціянства пачнецца са звароту вернікаў да самай цэнтральнай падзеі
– сустрэчы з Езусам. Менавіта да гэтага Папа заклікае Касцёл, асабліва ў гэтыя дні.